Argentina-in Iron Maiden chawimawina hlan

Argentine Natio­nal Congress chuan English heavy metal band Iron Maiden chu chawimawina "Visi­tors Of Honour" an hlan.

He chawimawina hi Salon De Los Pasos Perdidos hmuna hlan an ni. Kumin kum tir khan Chamber of Deputies of the Argentinian Congress chuan chawimawina hlan an nih tur hi a lo pawmpui tawh a ni.

Iron Maiden frontman Bruce Dickinson chuan, "Kan band hian music hi kan hmangaih a, Argentina ram hi kan ngainain kan hmangaih em em bawk a ni. In chaw te, in footballer-te kan duh em em a, keimah phei chuan a bik takin, rugby fan ruhkawl ka nihna angin in rugby player-te ka ngaina leh zual a ni. He chawimawina min pek avang hian kan band aiawhin lawm thu ka sawi a, ka thinlung chu Argentina-ah a cham reng tawh dawn a ni," a ti.

Kumin April thla khan Bosnia and Herzegovina khawpui Sarajevo khua leh tui nihna chu Dickinson hnenah hian hlan a lo ni tawh bawk. Heihi kum 1994-a Sarajevo khuaa solo ropui tak a hnutchhiah vang a ni.