Booker Prize: Margaret Atwood leh Bernadine Evaristo hnenah hlan

Booker Prize 2019 Award dawng turin Marga­ret Atwood leh Bernadine Evaristo chu thlan an ni. 

Booker Prize dawng tur hi English-a novel ziah, UK leh Ireland-a publish aṭangin thlan chhuah ṭhin a ni. Kum 79 mi, Atwood hi Book winner ni tawh zinga upa ber niin, Eva­risto hi mihang hmei­chhe zinga dawng hmasa ber a ni bawk. 

Margaret Atwood hi a lehkhabu 'The Testaments' leh, Bernadine Evaristo hi 'Girl, Woman, Other' vangin he chawimawina dawng tur hian thlan an ni. Author pahnihte hian chawimawinain a ken tel, $62,800 chu an insem a ngai dawn ta a ni.

Canadian author, Atwood hian kum 2000 khan a lehkhabu, 'The Blind Assasin' vangin he chawimawina hi a lo dawng tawh bawk. Kumina a dawnna, 'The Testaments' hi 1985-a tihchhuah, best-selling novel 'The Handmaid's Tale' chhunzawmna a ni. 

Everisto hian 'Girl, Woman, Other' tihah hian mihang hmeichhia, kum 19-93 inkar mi 12, Britain-a chengte chanchin a ziak a ni. Booker Prize hi a rualin ziaktu pahnih hnen­ah ṭum hnih hlan a lo ni tawh a, mahse kum 1993 khan dan siamṭhain, ziaktu pakhat hnenah chauh zel hlan tura tih a ni. Mahse hetichung hian judge-te chuan he dan siamṭhar hi zawm loin, lehkhabu pahnihah hian chawimawina dawngtu tur thlan chhuah tur zawk an hre lo tih sawiin, a pahniha an thlan thu an sawi.