MPL ground reporter Angelina

Mizoram Premier League Season 8 chu vawiin aṭangin Kolasib-ah khelh ṭan a ni dawn a, ground reporter pahnih Angelina VL Hriatpuii leh Lallianzami (Zam Zami) te an inlan ve ve ang.

Ramhlun Venglai nula Angelina tan tun season hi MPL-a a vawi khat inlanna chauh a ni a, amaherawhchu infiamna khawvelah erawh mi thar han tih tur a ni lo. Mizorama basketball inelna sang ber Mizoram Super League-ah hnehsawh takin a inlan tawh ṭhin. 

Angelina chuan, "Zin hi nuam ka tih zawng tak a ni a, Kolasib phei chu kan chhungte awmna a nih avangin ka kal fo. Hun nuam tak kan hman ngei ka beisei," tiin Vanglaini a hrilh a, inkhel en turin Kolasib mipui a sawm nghal bawk.

Ṭhalai tan phei chuan Angelina hi hriat ngei a ngai tlat, nikum khan Hrangbana College-ah Miss Multimedia leh Lady of the Year-ah thlan a ni. Football tui sa ni bik lo mah se an chenchilh meuh chuan tualchhung football a hre chho ṭan a, MSL bakah kohhran programme leh mimal function-te a kaihhruai tawh avangin mi kawm vel erawh a chem kalna tih hun rei lote chhungin a lantir nghal.

MPL hi hlawhtling takin Lunglei, Champhai leh Serchhip-ah te neih a ni tawh a, football ngainatna hmun Kolasib-ah a danglam lo ang.