Mizo rimawi khawvel rohlu C. Lalrinmawia a fam ta

Mizo mipa zaithiam C. Lal­rinmawia chu nimin zing dar 8.25 khan cancer natna vangin kum 64 mi niin a thi. A nupui Lalchhuanawmi (Ṭhahmingliani tia amah C. Lalrinmawia'n hlaa a lo chawi) leh a fate pathum leh a tute pahnih a kalsan.

June 21, 1955 khan Chaltlang­ah piangin a thih ni thleng hian Chaltlangah hian a khawsa a,  Chaltlang lal hmingthang tak Thangphunga tupa a ni. An unau hi pasarih an ni a, ani hi a upa lam aṭanga chhiara palina a ni. A nupui Lalchhuanawmi nen hian 1984 khan inneiin fa pali an nei a, an fapa upa ber hi a thi tawh a ni. 

Kolkata (khatih hunlaia Calcutta) a awm laiin zai lamah bul ṭanin School Choir-ah te a tel a. Hetah hian Anglo-Indian leh a Black ṭhiante nen band-te dinin school concert-ahte an zai ve fo a, he ta ṭang hian zai lam a luh chilh chho ṭan ta a ni. 

Aizawla a lo haw leh hnu-ah pawh zirna lam chhunzawm loin zai lamah a inhmang chho ta a; 1974-a Chinar Beat Contest-ah ‘Selection 5’ tih pop group-ah vocalist a ni a, Diamond Cross Band-ah pawh vocalist niin Mizoram Theatre Hall-ah te, AR Lammualah te, Lunglei Town Hall-ahte a zai a, beat contest hrang hrangah a zai nasa a, Mizo hla mai bakah sap hla pawh a sa ṭhiam ṭhin hle.

Kum 1976-ah Virthlileng group/band angin All India Radio, Aizawl station-ah an zai ṭan a, 1977-ah solo-in hla a record ve ṭan a, radio artiste lawm hlawh ber pawl a ni chho ta a ni.

AIR, Aizawl station-ah hla 50 vel zet a record. Hla 20 vel phuah bawkin, a ṭhiante nena an hla phuah lar tak tak pawh eng emaw zat a awm bawk. A hlate hi Zofaten vawiin thleng pawhin kan tuipui em em vekte an ni hlawm.

Local TV channel leh Door­darshan Aizawlahte pawh music video eng emaw zat a khung a, a hla khungte hi thlan hlawh pawl tak an ni ṭhin. Audio casette album pali a record bawk a, heng a album-te hi a hit em em vek a, vawiin thlenga Zofate min awitu an la ni fan.

A hla phuah zingah hian 'Di Chambawihpui', 'Zaleng hei zawng zingah,' leh 'Chamrih la tlaitla engmawi,' tihte hi an lar zual hle a, Mizoin rimawi kan ngaihthlak chhung chu a dai leh tawh ngai lo ang. A hla sak lar zingah - 'Ngaih­zuali', 'Vanglai nun', 'Ka di lenmawi', 'Phurh zawh loh zun', 'I rau i thla tal rawn tir rawh', 'Ṭhahmingliani', 'LT a mak ka ti,' 'Kar hla di', 'Chhaktiang Chhawkhleipari', 'Aw Di Mam­pui', 'Tlang Zamualpui', 'Ka lung lawm nan' leh a dangte chu tunlai thlenga Mizote hla duh a ni.

Kum 1979 leh 1980 khan khatih hun laia Radio ‘top artiste’ tih theih ṭhiau- F. Lalnunfima, Zirsangzela Hnamt­e, Liandai­lova Chhangte leh Zira Hnamte-te nen All Mizoram Concert Tour hlawhtling tak mai an nei a, Mizoram chhunga khaw lian zual sawmhnih an hrut chhuak a ni. An tour hun chhung hian Pu Lalnunmawia (Valtea) pawhin a rawn zawm ve bawk.

He an tour hi mipui ten an hlut em em mai a, ticket pawh an inchan lo nasa ṭhin. Mizo Zaimi Insuihkhawm pawl (MZI), August 30, 1980-a lo piang ta pawh hi he concert tour hlawh­tling tak hrin chhuah hi a ni. Mizoram Beat Contest-1979 A.R. Lammuala a zai a hmuna ngaithlatute sawi danin, mipui pungkhawmte an ṭin mek tawh laiin a zai hun a lo thleng a, a zai hre phate chu lo let lehin mipui chuti zozai pungkhawmte chu a zai ngaithlain an reh ṭhup mai a ni. Hemi ṭum hian lawmman pakhatna a dawng nghe nghe. A vanglai hian group leh solo ang pawhin lawmman engemaw zat a dawng. 

Kum 2015 kumtir lamah khan chawkawng Cancer a nei tih hmuhchhuah a ni a, hemi hnu hian zai nghal niin, eng emaw chen chu han ṭha ve viau mah se 2016 khan chemotherapy-te la lehin course pawh a la zo ṭhak bawk.

Kumin kumtir aṭang khan a taptawm chho hret hret a, September thlaah phei kha chuan a tho chhuak peih tawh meuh lo a, zawi zawiin chak lo lam pan zelin nimin zing dar 8.25 khan "Tlaitla eng mawi" chu chelhdin zawh lohin a liam ta a ni.

Mizote hi zai ngaina hnam kan ni a, zanah thla a en det det tawh chuan veng hrang hrangah tlangval an ṭhukhawm a, ṭingṭang perhin an zaikhawm mai ṭhin. Chung veng tina tlangval lungleng zaite chuan C. Lalrinmawia hla pakhat tal hi chu an sa tel ziah a ni, ti ila kan sawi sual tam awm lo e.

Zaithiam, hlaphuah thiam, aw pa tak, titi thiam leh fiamthu duh C. Lalrinmawia hi Zofate awm chhung chuan a hming a dai leh tawh ngai lo ang.

•    C. Lalrinmawia hi lemziak thiam, Cartoonist a ni tel.

•    A nu leh pa- Thanglian­chhunga leh Lalthanchhungi.

•    Mizoram PWD hnuaiah Operator a ni ṭhin a, a pension thlengin he hna hi a thawk.

•    C. Lalrinmawia  hian Chal­­tlangah zirna bul ṭanin, St. Maria Gorettis Con­vent School, Kolasib leh St. Thomas Boys School, Kol­kata-ahte lehkha a zir ṭhin. 

A chawimawina dawn Ṭhenkhat

Kum    Chawimawina dawn

1992    Lelte Award, Mizo Best Male Vocalist

1996    Lelte Award, Mizo Best Male Vocalist

2015    Heritage Wall of Fame

Kum     Album hming            Recording

1982    Tawnmang Lasi        Otto Recording

1988    Dichambawihpui        Otto Recording

1990    Nunhlui                    Otto Recording

2005    Ngaihzuali                Faith Recording