Hontrade International Ṭhazual Fakna No.1-ah Lalthlengliani 'Jehova Elohim'

Hontrade International Ṭha­zual Fakna chart-ah Lalthlengliani 'Jehova Elo­him' chu pakhatna a ni a, Lalthlengliani hla aia thlan hlawh a awm lo. Lal­hma­ngaihzuali (Nunui) 'Hrem­hmun' chu pahnihna niin Sawmtea 'A va mak em' chu pathumna a ni bawk.

August thla tawpa tihchhuah Lalthlengliani hla thar ber 'Jehova Elohim' hi Ṭhazual fakna chart luahlumtu hun eng emaw chen a ni tawh a, tlangzarh a nih hnu aṭang khan chart-ah a mikhual lo hle. Tunah erawh tuma tluk rual loin No. 1 dinhmun a rawn luah thei ta a, a hla a nalh bakah a video a hmuhnawm bawka, a phu hle a ni.

Malsawmtluanga (Mala) Chhakchhuak phuah 'Jehova Elohim' hi Thlengi hian a sa nalh hle  a, a mawina a sa chhuak zo chiang hle. Rka 3brothers recording studio-ah recording hi tiin video hmuhnawm tak leh mawi tak mai hi Chiangtea videography kutchhuak a ni bawk.

MDM YouTube channel lamah pawh en theiha chhawpchhuah a ni tawh bawk a, he hla nalh titu tan chuan heihi chanchin lawmawm tak a ni ngei ang. Chart hmasaah khan panga­na  niin tunah erawh pa­khat­naah a rawn inhlangkai dawrh a ni a, hei hian a hla nalh zia a hril awm e.

Lalhmangaihzuali (Nu­nui) hla, dangdai tak mai leh music video pawh changkang taka a siam 'Hremhmun' chu pahnihnaah a rawn invawrh ve bawk. Chart hmasaah khan parukna niin tunah erawh pahnihnaah a rawn invawrh thung a, hma a sawn chak hle a ni.

Sawmtea pawhin a hla thar ber 'A va mak em' chu hma sawn pui zelin pathumna a rawn nihpui ve leh bawk. Ani pawh hi ṭhazualah a cheṭha ṭhin hle a, hmabak eng tak nei zinga mi niin, dinhmun ṭha lehzualah a rawn invawrh a nih pawhin thilmak a ni lo ang. Chart hmasaa pakhatna Hmingtea Chhangte 'Isua Hmel' chu palinaah a awm ve thung a, Lalremruati (Naemi) 'Intlansiakna' pawh pahnihna aṭangin panganaah a tla thla ve leh bawk a ni.

1    Lalthlengliani    Jehova Elohim

2    Lalhmangaihzuali (Nunui)    Hremhmun

3    Sawmtea    A va mak em

4    Hmingtea Chhangte    Isua hmel

5    Lalremruati (Naemi)    Intlansiakna

6    Thawhlehnaniropuia    I tan ka hlan e

7    Sanga Renthlei ft Hlimhlimi    Ni ropuiah chuan 

8    R. Lalruatsangi    Chanchintha hril

9    Ruatpuii    Ka lawm e Lalpa

10    Ruthi CVL Muanpuii    Lalpa nang hnaih zel hi