Jennifer Lawrence-i'n pasal nei

Inrinni liam ta khan Hunger Games star Jennifer Lawrence leh Art Gallery Director Cooke Maroney chu an innei.

Jennifer Lawrence-te hi Rhode Island-a Belcourt Castle-ah an innei a, he hunah mi sawm bik an chhungte leh an ṭhian ṭha 150 bawrvelin an tel pui a ni. Adele, Kris Jenner, Nicole Ritchie a pasal Joel Madden, Cameron Diaz, Sienna Miller, Emma Stone leh Ashley Olsen-te chu he inneihna a milar kal langsar zualte an ni bawk.

Lawrence leh Maro­ney hi kum 2018 aṭang khan an inzui ṭan a, kumin February thla khan an lo inhual tawh bawk. An inhualna lawmna hi May thla khan New York-ah an nei a, September thla khan marriage license an nei tawh bawk a ni. 

"Ka nuna ka hmuh tawhah mipa ṭhaber a ni a, Maroney nena inneih hi thutluk siam harsa lo tak a ni," tiin Lawrence hian a pasal chungchanga Entertainment Tonight-in an kawmnaah a sawi. Kum 29 mi Lawrence hi Oscar award-a Best Actress pawh lo la tawh a ni a, a pasal kum 34 mi Cooke Maroney hi Gladstone 64 art gallery director a ni thung.