Tun hnaia zaithiam lar ber Olivia Rodrigo!

Billboart Hot 100 chart topper ni mek Olivia Rodrigo hi i lo hre tawh em? Kum 2021 kan la hmang rei lo a, chuvang chuan kumin bikah hi chuan a ni aia zaithiam lar hi khawvelah an awm lo, ti ila kan sawi sual lo mai thei. Kan ziak uar mah mah in ti a ni mai thei, mahse Vogue meuh pawhin tun dinhmunah chuan 'biggest pop star on the planet' niin a chhal.

Thla hmasa mai kha chuan Disney+ High School Musical TV spin-off star pakhat ve mai a ni a, a lar em em lo. Mahse January 8 khan ama puala a single hmasa ber 'Drivers License' a tichhuak a, chu chuan rimawi khawvel thlipui ang maiin a rawn nuai ta a ni.

'Drivers License' hi a tlangzarh aṭanga ni thum lekah Spotify record rawn siam nghalin  'most streams in a single day' record a siam. UK leh US chart-ah No.1 a ni nghal a, kum 2016-a tihchhuah Zayn Malik 'Pillowtalk' hnua hla kar khat chhunga hralh kal ber a ni. Hetiang taka a lar hi miin mak an ti. Rimawi khawvelah sulhnu a la nei miah lo chu a ni lo, mahse rimawi khawvelin Olivia Rodrigo hi an hmelhriat ngai lo tih theih tluk a ni a, hla pakhat a tlangzarh a, a lar nghal hluai a ni ber.

Chu a chhapah a larna belhchhah turin kum 10 liam ta chhunga zaithiam ṭha bera AMA-in an thlan, Taylor Swift-in a lawmpuina thu Instagram-ah a post a, hei hian mi ngaihven a hlawh zual tir a tih loh theih loh. Kar khat chhunga Spotify-a hla an stream tam ber record a siam leh tawh bawk a, hetiang khawpa single hmasa ber larpui thei hi an tam lo ang.

"Kar khat chhung leka ka nun pum thlak danglama a awm hi a mak hle," tiin Rodrigo chuan sawiin,"Nitin ka inah awmin homework ka tih ṭhin, mahse kum 10 vel ka nih lai aṭanga ka mi ngaihsan em emte'n min rawn be pawhin ka music an ngainat thu an rawn sawi. Thil tak tak ni si mak tak ni si a ni," a ti.

Olivia Rodrigo hi kum 17 chiah a la ni a, rimawi khawvela hmabak nei eng ber zinga mi a ni tih loh rual a ni lo.