Internet khawvel run mektu Bernie Sanders leh a Jacket

US president 46-na Joe Biden lakluhna inkhawm kar hmasa Nilainia neihah khan  inkhawm chhimtu tam ber chu suit nen nalh taka an kal laiin Vermont senator Bernie Sanders chu Jacket lum tak leh kutkawr(mitten) bun chungin a lo ṭhu hlun a, lakluh inkhawm zawh hnu lawk aṭang khan Bernie Sanders thlalak chu Internet khawvela 'memes' lar ber a ni zui a, netizens lamin an hlimpui nghal hle.

Celebrity-te pawhin infiamna atan tak an hmang a, an thlalak sirah Bernie Sanders thlalak hi an bel nasa hle a ni. Canadian prime minister Justin Trudeau pawh chung zingah chuan a bang bik lo, Inrinni liam taa press conference a nei lai thlalak a tweet-ah a sirah Sanders-a thlalak chu a bel ve hram!

Mi ṭhenkhat chuan Game of Throne-a Iron Throne-ahte an lo ṭhut tir thul, ṭhenkhat lahin Britney Spears an ṭhutbeh tir thul! Tunah hian thlalak photoshop hlawh ber a ni mek tih loh rual a ni lo. Kum 2016 leh 2020 khan Democratic Party-in US President nomination an zawnnaah pahnihna a ni ve ve a, presidential candidate a ni zo lo chiah chiah ve ve tihna a ni. Congess member ni tura thlan tlin a nih hma hian  Burlington, Vermont-ah Mayor a ni ṭhin bawk.

Kum 2019 December thla velah President lakluh inkhawma a hak a Jacket ngei mai ha hian internet lamah a lo lar vak tawh. 'I am once again asking' meme vangin internet lamah a lo lar chiam tawh a nih kha. Kum 2021-ah pawh kha a Jacket bawk kha a rawn larpui leh ta a ni.

CBS-in an zawhna chhangin Barnie Sanders chuan Vermont-ah chuan khua a vawh avangin thawmhnaw an ha lum ṭhin a, a mawi em tih ai chuan a lum em tih chu an thupui zawk a nih thu a sawi. Late Night with Seth Meyers-ah pawh lum taka ṭhut chu a tum a nih thu sawiin, a 'mitten' chu Vermont-a zirtirtu pakhat siam a nih thu a sawi bawk. Amah pawhin a hlimpui hle niin a lang.