Vanglaini Bihchianna Ṭhalaiten thil zawrh nan Social Media an ringtawk

Tunlaiah Social Media kaltlanga thil zuar an tam ṭhin hle. Facebook, WhatsApp leh Instagram-ahte pawh thil zawrhna group, account leh page hrang hrang a tam ta. Mi tam tak chuan an thil hman hlui zawrhna atante pawh an hmang ṭangkai hle tih hmuh theihin a awm.

Vanglaini-in bihchianna a neihah pawh ṭhalaite zingah thil zawrh leh fak chhuahna atana ṭha tawka hria an tam hle. Vanglaini chuan  Mizo ṭha­laite zingah Social Media chung­chang zirchianna neiin, College hrang hrang panga - Govt. Aizawl College (GAC), Govt. Aizawl West College (GAWC), Zirtiri Residential College (ZRC), Govt. Hrangbana College (GHC) leh Pachhunga University College (PUC) zirlaite aṭangin questionnaire siamin data a lakhawm a ni. He an zawhna siam hi College tin aṭang hian zirlai 100 ṭheuhin an chhang.

College zirlai 500 zinga 64% zet hian So­cial Media platform pa­khatah account pakhat chiah an nei a, a tlem zawk 36% erawh chuan account pakhat aia tam an nei thung.

Zirlai 320 chuan platform pakhat­ah account pakhat an neih thua an chhan laiin, 180-te erawh chuan pakhat aia tam an neih thuin an chhang a ni. GAC leh ZRC-ahte hian zawhna chhangtu zinga 73 leh 72-te chuan platform pakhatah account pakhat an nei. GHC-ah erawh an inthlau lo hle a, mi 45-in account pakhat aia tam an neih laiin, mi 55-in pakhat chiah an nei thung. College zawng zawngah hian account pakhat chiah nei an tam zawk vek a ni.

Social Media-a  fakna(ads)/sponsored post hmuh vanga thil lei phah hi an tam lo hle a, zawhna chhangtu aṭanga 24% chiahin an lei phah thuin an chhang. Mi 382 zet chuan an Social Media-a an advertisement hmuh avangin an thil lei tur kha an lei phah lem lo a, chutih rualin mi 118-te chuan an lei phah ve tawh thung a ni.

Mizo ṭhalaite chuan thil zawrh emaw fak­na atan emaw  So­cial Media hi ṭha an ti tawk hle.

Zirlai 500 zinga 394 zet chuan thil zawrhna atan leh fakna atana ṭha tawkah an ngai a, heihi 78.8% a ni phak. Hei hian ṭhalaite hian thil zawrhna atana ṭha an ti tawk hle tih chiang takin a tilang a, college zawng zawngah rintlak tawka hria pawh an tam hle.

PUC-ah phei chuan zawhna chhangtu 100 zinga 85 laiin thil fakna leh zawrhna atan ṭha an ti  a, hetihlai hian GAC-ah chuan mi 30 lai ṭha tawk loa hretu an awm ve bawk. Hetiang a nih mek lai hian zirlaite zingah erawh thil zawrh­na atana hmang an la tam lo hle thung.

Mi 160 chuan thil zawrhna atan an hman ve tawh laiin, mi 340-te chuan engmah an la zuar ve lo a ni. 

Mizo ṭhalai tam zawk hian platform pakhata account pakhat aia tam neih hi ṭul an ti lo niin a lang a, a neih pawh an nei lo reng bawk a ni. 

Chumai ni loin, an rilru pawh a nghet tawh hle a tih theih awm e. Social Media thil post an hmuh avanga thil lei ta mai mai an tam lo hle bawk. Hetiang hi ni mah se thil zawrhna atana ṭha ti an tam hle thung. Hei hi thil danglam tak a ni. Social Media-a thil post hmuh vanga thil lei an tam loh hle lai hian, thil zawrhna atana ṭha tawka ngai an tam hle thung.

Ṭhalai, a bikin zirlai zingah Social Media-a thil zuar an tam lo. Ṭhalaiten milar an follow nasa hle a, an nunah erawh nghawng a nei nasa lem lo. Hetichung hian zirlai zinga tlem azawng nunah erawh nghawng a nei thung.