Vanglaini Bihchianna Ṭhalaiten WhatsApp an hmang nasa ber

Mizo ṭhalaiten Social Media an hmang nasa hle a, hmang lo abar pawh an awm lo. Platform hrang hrang pawh an khawih kual nasa hle a, chung zingah chuan WhatsApp an hmang nasa ber tih Vanglaini chuan bih­chianna a neih aṭangin a zir chhuak.

Tunlai khawvelah Social Media tel loa hun hman hi mi tam tak chuan harsa kan ti tawh a, chumi a nih avang chuan Vanglaini chuan  Mizo ṭhalaite zingah Social Media chungchang zirchianna neiin, College hrang hrang panga - Govt Aizawl College (GAC), Govt Aizawl West College (GAWC), Zirtiri Residential College (ZRC), Govt Hrangbana College (HBC) leh Pachhunga University College (PUC) zirlaite aṭangin questionnaire siamin data a lakhawm - college tin aṭang hian zirlai 100 ṭheuhin an chhang.

Ṭhalaite zingah zing thawh veleh thil dang ti hmasa loa Social Media check ṭhin an tam hle a, a tam zawk fe an ni ngei ang.

Vanglaini zawhna chhangtu 500 zinga 383 zet chuan thawh veleh an 'check' ṭhin a,  hetihlai hian 'check' ngai lo chu mi 117 an ni. Zng thawh hlima Social Media lama dâk lut nghal ṭhin zat hi 77% a ni phak a, hei hian Social Media-in ṭhalaite nunah bu a khuar thuk zia a tilang.

Zirlai 375-te chuan Social Media vangin zan an menrei phah laiin 125-te erawh chuan zan men rei phah nan an hmang ve lem lo.

College zawng zawngah hian a tam zawkin zan men rei phah nan an hmang vek a, ZRC bikah hian mi 80-in an men rei phah thuin an chhang a, PUC-ah erawh mi 73-in an men rei phah thung. A dang zawng- GAC, GAWC leh HBC-ahte hian 74 ṭheuh­in Social Media hi an men reipui ṭhin.

Vanglaini-in zawhna a chhawp­chhuahah hian platform pariat a tarlang a, chungte chu- Whats­App, Facebook, Insta­­gram, Twitter, Pinterest, Snap­chat, YouTube leh Tumblr-te an ni.

Ṭhalaite hian heng zawng zawng hi an hmang vek a, social media zinga lar lo ber pawh hi mi tlem te talin an hmang. WhatsApp hmangtu an tam fal hle a, zawhna chhangtu zinga 486 (97.2%) zetin an hmang. Hei hian Zoram pum ang pawhin WhatsApp kan hman nasat zia a pholang ti ila kan sawi sual lo ang.

WhatsApp hi YouTube-in a dawt a, mi 461 chuan YouTube-a an luh ṭhin thuin an chhang. Instagram  hmangtu 412 awm bawkin, hman nasat pathumna a ni a, Facebook chu palinaah awmin mi 396-in an hmang bawk.

Twitter hi Mizo ṭhalaite zingah chuan a tlana vak lo a ni ang, mi 59 chiahin an hmang ṭhin a, an khawih tlem ber chu Tumblr niin mi 13 chiahin an hmang.

GAC, GAWC leh ZRC-ahte chuan zawhna chhangtu zingah Tumblr hmang an awm lo a, GAWC-ah Pinterest hmangtu an awm lo bawk a ni.

Mizo ṭhalaite hian Social Media platform hrang hrang hi an hmang kim thawkhat hle a, zawhnaa tel lo platform dang pawh an hmang ngei ang. WhatsApp an khawih nasa ber lawr lak a, hei hi thil mak a ni lem lo.

Zan menrei phah erawh an tam hle a, hei hian an nunah ngawng ṭha leh ṭha lo a nei ngei ang. Chutihrualin, zan menrei phahna atana hmang lem lo pawh eng emaw zat an la awm ve tih a hriat bawk. Zing thawh veleh Social Media 'check' nghal pawh an tam hle a ni. WhatsApp, YouTube, Instagram leh Facebook-te hi Mizo ṭhalaite zinga hman nasat zual a ni.

Khawthlang mite leh thuthar thehdarhtuten 'news source' pawimawh ber pakhata an hman  Twitter erawh Mizo  ṭhalaite zingah a tlana vak lem lo.

•    College zirlai zawhna chhangtute hian Social Media an hmang vek

•    Kum 17 chin chunglam ten zawhna hi an chhang. Kum 17-22 inkar an tam ber.

•    Nikhata Darkar 5 aia tam khawih an tam ber.

•    News hriat phahna atana hmang an tam hle.

•    Celebrity an follow-ten an nunah nghawng a nei lem lo.

•    Zawhna chhangtu zingah hian hmeichhia an tam zawk.

•    Social Media i hmang ṭhin em?

•    Eng Social Media platform nge i hman?

•    Ni khatah Social Media khawih nan darkar engzat nge hun i hman? 

•    Social Media platform pakhat-ah account pakhat aia tam neih i nei em?

•    Zing i thawh veleh Social Media i check ṭhin em?

•    Social Media vang hian zan i men rei phah em?

•    Social Media vang hian tunlai thil thleng i hriat awlsam phah em?

•    Social Media hi khawvel thuthar(news) hriat nan i hmang tangkai em?

•    Social Media a fakna(ads)/sponsored post i hmuh vang hian thil i lei tawh em?

•    Social Media-ah thil i zuar ve tawh ngai em?

•    Thil zawrh/fakna chhuah nan Social Media hi tha tawkin i hria em?

•    Social Media-ah hian milar(Celebs)-te i follow em?

•    I follow a nih chuan, an thil post-te hian thutlukna i siam dawnin nghawng a nei em?