Hontrade International Ṭhazual Lengzem Manuna 'Ka hmangaih vang' tluk zo an awm lo
Hontrade International Ṭhazual Lengzemah Manuna hla thar ber 'Ka hmangaih vang' chu pakhatna a ni a, Van Hlei Sung 'I ṭang ka belh lai khan ka hlim zawk si' chu pahnihna niin, Jaui 'Lo hnai la' chu pathumna a ni bawk.
'Ka hmangaih vang'
Ṭhazual Award 2019 sem zan khan tlangzarh a ni a, Manuna hian khami zan kha thiam takin a sa nghal bawk.
YouTube lamah thlirtu mi nuai hnih chuang fe a nei tawh a, a hla a nalh bakah music video a hmunawmin, a video ringawt pawh hi kalphung nei mumal tak a nih avangin en a manhla a, Ṭhazuala pakhatna a ni thei pawh hi thil awm tak a ni.
'Ka hmangaih vang' hi amah Manuna phuah hi a ni a, music video hi BS Pictures siam a ni thung. Tlangzarh a nih aṭang khan Ṭhazual chart-ah hian a mikhual lo nghal hle bawk.
Van Hlei Sung leh Jaui
Tunlai hla tihchhuah tharte hi chu a lar leh lar loh tehfung pawimawh tak pakhat chu YouTube lama thlirtu an tam leh tam lo hi a ni. Rpa Ralte hla phuah, Van Hlei Sung-i'n thiam taka a sak hi YouTube lamah thlir a hlawh hle. A Lyric video ringawt pawhin thlirtu maktaduai 1.5 a nei tling a, a hnua music video a tichhuah leh pawhin thlirtu nuai 4 chuang a nei leh tawh. Van Hleu Sung 'I tang ka belh lai khan ka hlim zawk si' hi chanchinbu chhuah loh lai khan pakhatna a ni a, tunah erawh pahnihnaah a awm ve leh ta thung a ni.
Pathumna dinhmun luahtu Jaui hla thar 'Lo hnai la' pawh hi Ṭhazual award sem zana a tlangzarh tho kha a ni a, YouTube lamah mi nuai dawnin an thlir tawh. Ani pawh hian a dinhmun a sawhnghet zel a, dinhmun ṭha bera ding tur pawhin a dinhmun a ṭha hle.
DJ Lalvenhimi 'Ka dawn lungruk' chu palina a ni a, Teawmi 'Facebook' chu panganaah a rawn inhlangkai ve bawk.
HONTRADE INTERNATIONAL THAZUAL LENGZEM TOP 10
1 Manuna - Ka hmangaih vang
2 Van Hlei Sung - I ṭang ka belh lai khan ka hlim zawk si
3 Jaui - Lo hnai la
4 Dj Lalvenhimi - Ka dawn lungruk
5 Teawmi - Facebook
6 RPA & Rinhlui Pialtu - Lokir leh mai rawh
7 Aziri - Ka thlang ber che asin
8 Marshall Fka ft Lazzy - Kumtluang atan
9 RD - BOLD V.2 (Confession)
10 Feli Fanai - Lengdang ṭang a bel