Zorinzuali hla thar 'Pialralah' zaninah

Zorinzuali Khiangte hla thar 'Pialralah' tih chu zanin hian Zonet-ah ena ngaihthlak theihin a awm dawn.

'Pialralah' phuahtu hi Zoremi Colney niin, music siamsaktu leh recording tihsaktu hi Michael M Sailo a ni. A phuahtu leh music/recording buaipuisaktute hi he khawvelah hian an awm tawh lo a, hei hi he hla ti hlu zualtu pawh a ni a, Zorini pawh hian a hlut hle.

Video hi Volts & Volume kut­­chhuak a ni bawk a, en a man­hla hle ang. In phatsanna lam hla a ni a, mipain an inhmangaihna kawnga hmeichhia a phat­sanna hla, hmeichhiain hreh­awm a tihna lam hawi hla niin, hla lungkuai tak a ni. Pialral thlenga lendun a tiam tawh hnua a phatsan leh si, hmeichhiain hreh­awm a tih thu Zorinzuali hian thiam tak leh lungkuai takin a sachhuak a, hmaih chi a ni lo ang.

Backing vocals-ah hian Michael M. Sailo-a aw ngaih­thlak tur a awm bawk a, hei hi thil hlu tak, mi tam tak lung­lenna phawkchhuak tur a ni ngei ang. Zorinzuali hi Ṭhazual Award November thlaa sem turah nomination pahnih- Best Female Artist Lengzem leh Best Music Video Lengzem-ahte nomination hmu thei a ni a, nomination pakhat aia tam hmu thei tlemte zinga langphak a ni.