Jennifer Garner-i'n a fanu IG khawih a khap

Mizo zingah chuan ṭhalaite mai ni lo, naupang lam thlengin nasa taka social media an khawih laiin Daredevil star Jennifer Garner chuan a fanu chu Instagram ac­count a neih a phal tlat lo.

Garner hian Ben Affleck nen an inneih lai khan fa pathum an nei hman a, a upa ber Violet, kum 13 mi chu social media-in naupang zawkte nunah nghawng nasa tak a neih ṭhin ang a neih ve hlauin a theih anga rei chu IG account neih a khapsak dawn tih a sawi. Social media hi thil hrisel leh experience ṭha lam neihtirtu niin a ngai ve lo a ni.

'Next Question with Katie Couric'-ah hemi chungchang hi sawiin a fanu pawh hian vawi eng emaw zat chu IG account neih hi a dil a, ani erawh chuan, "Tleirawl Instagram khawihte hi an nun a hlim zawk a ni tih zirchhuahna min hmuh phawt la, kan sawi ṭha leh dawn nia," tiin a lo chhang hmiah mai.

IG-ah chuan thil ṭhalam a hmu hran lo tih sawiin, a fanu chuan a duh a nih chuan a account chu an endun mai theih thu a sawi bawk.