Matt Redman-a'n hla thar 'The Same Jesus' tichhuak

English Christian singer, worship leader leh hla phuah thiam ni bawk Matt Redman chuan a single thar 'The Same Jesus' chu a tichhuak ta.

'The Same Jesus' hi Zirtawpni liam ta khan YouTube lamah pawh lyrics video a dahchhuak tawh a, Matt Redman zai ngaithla ṭhintu tan chuan hmaih chi a ni lo ang. '10,000 Reasons' singer, Grammy award pawh eng emaw zat la tawhtu hian hun eng emaw chen hla thar a tihchhuah tawh loh hnuah 'The Same Jesus' hi a rawn tichhuak leh a ni a, Gospel music ngaithla ṭhintute tan chuan thu lawmawm tak a ni. He hla hi nakkum kumtir lama album a tihchhuah tur  'Let There Be Wonder'-ah a tel dawn bawk.

"Ka hla thar hian mi tiphur hle. Amah chibai kan buk hi nuam ka ti a, tuna Isua chibai kan buk hi awka chauha khawvel dintu, khawvela rawn kal Isua, Kross-a khenbeha thia tho leha tho kha a ni a, a lo kal leh dawn bawk. A thawnthu tawp thei loah hian kan awm a, nimin, vawiin leh chatuan Pathian a nihna anga chibai kan buk thei hi thil hlu tak a ni," tiin a hla thar chungchang hi a sawi.

Matt Redman hi Gospel hla ṭha tak tak phuah­chhuak tawhtu a ni a, 'The Heart of Worship' leh 'Blessed Be Your Name'-te kha Mizote English Gospel music ngaithla ṭhinte chuan an tuipui viau ṭhin a ni. Kum 2011 khan '10,000 Reasons' a rawn tihchhuah phei kha chuan khawvel a dengchhuak a, tunhnai kum 10 chhung vela hla ṭha bera ngaitu pawh an tam hle.