Billie Eilish-i'n Instagram comment a chhiar duh lo
Kum 18 mi American singer leh hla phuah thiam Billie Eilish chuan Instagram-a comment a chhiar duh lo tih BBC Breakfast interview-ah a sawi.
Comment a chhiar duh loh chhan hi engdang vang a ni lo a, amah sawiseltute ṭawngkam ṭha lo tak tak chuan a nunah a ṭha lo zawnga nghawng a neih theih avanga chhiar duh lo a ni tih interview tu Louise Minchin hnenah a hrilh.
Minchin hian Billie hnenah hian engtin nge a chunga harsatna thlengte chu a hneh theih ang tiin a zawt a, Billie chuan chhan ngaihna vak hre lo chung chungin, a at thlak a ni tiin tawitein Instagram comment a chhiar duh loh chungchang chu a sawi a ni.
"Tun hma zawng ai khan a rapthlak tawh zawk a ni. Kha leh chen comment ka chhiar kha thil mak tak a ni a, hmanah khan lo bansan tawh tur ka ni zawk," a ti hial.
Tunlai music khawvela hmeichhe zinga huhang ngah ber tia chhal ngam, Billie Eilish hian January thlaa khawvela music lama chawimawina ngaihhlut Grammy award panga lai dawngin, award ngaihhlut zual 'Big Four' award dawng thei naupang ber a ni. Chumai piah lamah hmeichhe zinga award lian pali zan khata dawng vek thei hmasa ber a ni bawk.
Nikum aṭanga award sem apianga hming ri ring pawl ni ziah Billie hian Thawhlehnia O2 Arena, London-a BRIT awards 2020 semnaah pawh khan Best International Female award a la leh a ni. Music huangchhungah award hlu tak tak kum thum chhung velin 44 lai a la tawh a, Oscar-ah pawh kum 18 lek mah ni se special performance nei tura thlan a ni bawk.
Billie Eilish award dawn langsar zual
American Music Awards (2019) - New Artist of the Year
Billboard Women in Music (2019) - Woman of the Year, International Singer
Grammy Awards (2020) - Album of the Year, Best Pop Vocal Album, Record of the Year, Song of the Year