CAA thlawp tura Bollywood sawmna hlawhtling lo

Pathianni zan a ni a, Mumbai-a Grand Hyatt hotel-ah Union minister Piyush Goyal leh BJP vice-president Bijayant Panda-te chuan Bollywood-a mi pawimawh tak takte chu Citizenship Amendment Act (CAA) sawipui turin an sawm a, an mi sawmte an kal ṭha lo a - Bollywood 'A Lister' an tih chin an inlan lo.

BJP chuan India rama dodal leh sawisel hlawh tak CAA chu mipui hnena hrilhfiah a, a thlawp zawnga au chhuaktu tur an zawng mek a, Bollywood lamah an ṭuan a; nimahsela an beisei angin an sawmna an chhang ta lo. Zanriah kil tura an sawm mi langsar tak takte chuan chhuanlam hrang hrang siamin an pha hlawm a, hetihlai hian CAA duh lotute chuan Bollywood lam hi an lo 'warning' ve reng bawk a ni.

Pathianni zana zanriah kil tura kal zingah hian Censor Board chief Prasoon Joshi, filmmaker Rahul Rawail leh Kunal Kohli, music director Anu Malik, producer lar Ritesh Sidhwani leh Bhushan Kumar, director Abhishek Kapoor, actor Ranvir Shorey leh Shailesh Lodha bakah singer Kailash Kher, Roop Kumar Rathod leh Shaan-te chu a langsar zinga mi an ni.

Mumbai BJP vice president Hitesh Jain chuan, "CAA chungchanga zawhna awm theite kan sawiho a, kan inhrilhfiah a ni. Hetiang inhmuh khawmna hi hmun dangah pawh buatsaih kan tum," a ti a; he hunah hian media lam kal phalsak an ni lo. Actor Ranvir Shorey chuan, "Hun ṭha tak kan hmang a, CAA chungchanga kan hriat duhte min hrilhfiah a ni," a ti.

Hetihlai hian an sawm zinga mi langsar tak tak Javed Akhtar, filmmaker leh actor Farhan Akhtar, filmmaker Kabir Khan, Rajkumar Santoshi leh Siddharth Roy Kapur bakah actor- Dia Mirza, Ayushmann Khurrana, Rajkummar Rao leh Vicky Kaushal-te chu an in­lan lo thung a; an mi sawm zinga langsar tak Karan Johar pawh a kal lo.

Pathianni zanah hian hotel kawtah CAA duh lotute an pungkhawm ve thung a, an thu ziak ken zingah “Bollywood we are watching. #MumbaiAgainstCAA,” tihte leh “Don’t disappoint your fans. Reject CAA NPR NRC,” tihte a tel.