Hontrade International Ṭhazual Lengzem-ah Lawmi Khiangte 'Love at first sight' a mawi ber

Hontrade International Ṭhazual Lengzem chart-ah Lawmi Khiangte hla thar ber 'Love at first sight' chuan thlan a hlawh ber a, Essy 'Kan hawi kir lo'ng' chu pahnihna niin, DJ Lalvenhimi 'Khuarei an' chu pathumna a ni bawk.

Ropui taka MPL Kick Off a nih zan khan Lawmi Khiangte hian a hla 'Love at first sight' a tlangzarh nghal a nih kha. Thiam taka sa zuiin mipui pungkhawmte lawm pawh a hlawh hle.

Thla hnih em pawh a la ral hmain Ṭhazual Lengzem chart-ah pakhatna a nihpui der a, chart hmasaah khan pahnihna niin tunah erawh tuman an tluk ta lo a ni. Tlangzarh a nih hnu lawk aṭang khan Ṭhazual chart hi a luah nghal a, a hla a mawi piah lamah a music video a hmuhnawm a, thlan a hlawh zui viau pawh hi a mak lo.

He hla hi amah Lawmi phuah a ni a, recording hi Foster Recording-a a tih niin Kima Chhangte produce a ni. Video hmuhnawm tak leh mi titlai tak hi Screenfarm production kutchhuak a ni thung.

Essy hla 'Kan hawi kir lo'ng' pawhin hma sawn zelin pathumna aṭangin pahnihnaah a rawn inhlangkai tawh a, dinhmun ṭha bera ding tur pawhin a beiseiawm hle. YouTube lamah pawh en a hlawh hle a, dinhmun ṭha berah a ding thei dawn em tih chu hriat chakawm tawh tak a ni.

Chart hmasaa pakhatna Dj Lalvenhimi 'Khuarei an' chu pathumnaah a awm ve thung a,  Sangkimi Khiangte 'Tuar thiam a har nge' chu palina niin Ticos Dara 'Lunghlu' chuan top 5 a khar thung.

Tun ṭum Ṭhazual Lengzem chart-ah hian hla thar pakhat lang a  awm a, chu chu CVL Hmudika 'A kim ngei ang' niin, pakuana dinhmun a rawn luah a ni.