Maleficent leh Joker inum boruak a sang

Box Office-ah Maleficent: Mistress of Evil khum thei an la awm lo a, Joker pawh pahnihna ni lehin The Addams Family chu pathumnaah a rawn inhlangkai ve leh bawk.

Maleficent: Mistress of Evil chuan $19,369,877 lalutin hma a la hruai a, a hmahruaina erawh a fal lo hle. Theatre 3,790-ah chhuah niin, a sum lakluh erawh a tlahniam ve deuh thung.

Khawvel puma a sum lakluh tawh chu $mtd 295.6 a tling tawh a, a hlawhtling hle a ni. Disney film Maleficent hian lawm a hlawh a, tlangzarh a nih aṭanga a kar hnihnaah pawh entu an la tam hle.

Joker(2019) chuan lawm a la hlawh reng a, kar thum zet a liam hnuah pawh a sum lakluh a la tam hle. Kar tawp liam taah khan theatre 3,936 aṭangin $19,248,035 a la lalut thei a, Maleficent a phak lohna hi tlemte chauh a ni.

Tunhnaiah he­tiang taka sum lakluh inhnaih hi an awm ngai meuh lo a, hei hian Joker hmuhnawm zia a tarlang chiang hle. Khawvel puma a sum lakluh tawh chu $mtd 851.7 a tling tawh a, kumina film tihchhuah zinga sum lalut tam ber zingah a inhlangkai der tawh.

Joaquin Phoenix-a Joker hian lawm a hlawh chhunzawm zel a, kar thum chhungin kumin chhunga film hlawhtling ber zingah a tel tawh a ni.

The Addams Family chu chart hmasa khan palina ni mah se hma a rawn sawn leh hret a, pathumnaah a rawn inhlangkai leh. 

Film thar Countdown chu palina a ni a,  film lian tak tak karah he supernatural horror film hi a rawn tlazep thei a, a hmuhnawm tih a chiang. Countdown app hmanga tleirawl Courtney-i'n darkar thum chiah a dam tawh dawn tih a hriat hnua thihna pumpelh a tumdan film hi a hmuhnawm hle ang.

Chart hmasaa pathumna Zom­bieland: Double Tap chuan The Addams Family leh Countdown a ngam ta lo a, sum lalut tam pangana niin top 5 a khar a ni.

Box Office top 10-ah hian Countdown bakah hian film thar dang pahnih Black and Blue leh  The Current War: Director's Cut chu an lang phak bawk a, parukna leh pakuana dinhmun an luah a ni. Top 100 chinah phei chuan film thar langphak 18 lai a awm.