Game of Thrones prequel series tihchhuah tur ṭhulh

HBO chuan Game of Thrones prequel series an tihchhuah tum, Naomi Watts channa tura an ruahman, nasa taka hma an lak tawhna tihchhuah tur chu an ṭhulh.

Naomi Watts a chang dawn tih sawilana a awm tirh khan boruak a nei lian hle a nih kha. Game of Thrones tawp danah mi tam tak an lungawi loh hnu khan GoT fan-te tana thu lawmawm hriat tur a awm a, chu chu a prequel series tihchhuah a nih tur thu leh lemchan lama sulhnu neiṭha tak Naomi Watts a chang dawn tih kha a ni.

He series hmingah hian 'Blood­moon' tih emaw 'The Long Night' tih emaw an hmang dawn nia rin a ni a, a title tur pawh an tihchian hmain an tawpsan leh ta niin Deadline report chuan a tarlang. Noami Watts channa tur hi nasa takin hma an la hman a, nipui chhung khan episode hmasa ber pawh an chang zo hman hial a ni. Mahse hei hi HBO lam duhthu a sam lo a, series puitlinga tihchhuah an zuam ta lo a niang.  

HBO-in an cancel thu hi a chang tur lam pawhin email-in an dawng vek tawh niin an sawi bawk.

Naomi Watts channa hi cancel leh mah se HBO chuan GoT chu an la bansan lo tih sawiin, a prequel dang 'House of Dragon' an tichhuak dawn tih an tarlang. ‘House Of The Dragon’-ah hian House Targaryen an thlurbing deuh dawn niin an sawi a, GoT hma kum 300 vela thil thleng, Daenerys thlahtute chungchang vel a ni ang.

George R.R. Martin-a lehkha­bu "Fire & Blood" behchhana siam a ni leh dawn tho a, Ryan Condal-a'n script a buaipui ang a, George R.R. Martin hi co-executive producer a ni dawn bawk. HBO chuan series 10 tichhuak turin a ti phawt a, GoT-a  "Battle of the Bastards" episode direct avanga 'Emmy' pawh lo dawng hial tawh chu co-showrunner a nih dawn bakah episode hmasa ber a direct  nghal dawn.

HBO Programming president Casey Bloys chuan GoT khawvel chu a hausa hle tih sawiin, House Targaryen chiang zawka thlurbing a nih dawn thu a sawi a ni.