British celeb, kum 30 hnuai lamah Ed Sheeran a hausa ber

British celebrity, kum 30 hnuai lam zingah 'Shape of You' singer Ed Sheeran chu a hausa ber. 

Kum 2018-a kum 30 hnuai lama hausa ber, Adele chu kumin May thla khan kum 31 a tlin tak avangin, Ed Sheeran hi hausa ber a ni ta a ni. Metro UK-in a tarlan danin, Ed Sheeran hausakna hi kum 2018 aṭang khan a let dawnin a pung chho hman a, £ matkaduai 90 aṭangin £ mtd 170-ah a pung chho. 

British celebrity, kum 30 hnuai lam hausa list hi kumintin Heat magazine chuan a tichhuak a, movie star, television personality leh musician-te a huam ṭhin a ni. Nikum khan Ed Sheeran hi pahnihna niin, hausak lamah Adele a phak lo. Ed Sheeran sum lakluhna tam ber hi Divide tour aṭanga a hmuh a ni a, kum hnih leh a chanve chhungin show 258 zet a nei hman.

Ed Sheeran hnuaiah hian Harry Potter star, Daniel Radcliffe awmin  £mtd 90 a nei. Harry Styles chu pathum­na a ni a, a hausakna hi £mtd 64 nia chhut a ni bawk. Kuminah hian top 10-ah Dua Lipa, rapper Stormzy leh Games of Thrones star Maisie Williams-te an lang thar.