Billboard 200 Morgan Wallen 'Dangerous: The Double Album' a la chungnung zel

Billboard 200 chart-ah kar hmasa lama pakhatna, Morgan Wallen 'Dangerous: The Double Album' bawk pakhatna a ni leh. 

Country singer Morgan Wallen-a studio album pahnihna hi  US Top Country Albums chart-ah pawh pakhatna a ni tho bawk a, US lamah chuan Country music-in ngaihthlak a hlawh ber rih a nih hmel a,  The Voice star hi US-ah chuan a tla na ber rih a ni. Kar tawp liam taah khan album unit 154.7 k lai a la hmu chhuak a, album sales aṭangin 18.1k a hmuh chhuah laiin song sales aṭangin 42.4k a hmu chhuak thung. Stream-tu pawh a tam hle a, stream maktaduai 160.4 lai a nei.

Pop Smole 'Shoot For The Stars Aim For The Moon' chu pahnihna a ni a, kar hmasa khan pathumna a ni thung. He album hi chart-ah hian a chung lamah a awm rei tawh hle a, top 5 chin velah a dinhmun hi a kual deuh reng a, US-ah chuan hun eng emaw chen chhung chu an ngaihthlak nasat ber a ni tawh.

Top 10-a album thar awmchhun 

Pathumna Why Don't We album 'The Good Times And The Bad Ones' hi top 10-a album thar awmchhun a ni a, January 15-a tlangzarh kha niin an album-ah hian hla 10 a awm a, chung zingah chuan Fallin’ (Adrenaline) chu a hit zual hle a ni.

Palina chu Taylor Swift album 'Evermore' kha a ni a, Ariana Grande chuan a 'Positions' hmangin top 5 a khar. Lil Durk 'The Voice' chu parukna niin, Eminem album 'Music to be Murdered By' chu 19-na aṭangin pasarihnaah a rawn inhlangkai leh dawrh bawk.

The Weeknd 'After Hours' chu parukna aṭangin pariatnaah a tla thla thung a, Juice WRLD 'Legends Never Die' chu pakuana niin Luke Combs 'What You See Is What You Get' chu top 10 khartu a ni.