The Great Gatsby TV Series?

A+E Studios leh ITV Studios America-te chu F. Scott Fitzgerald-a novel lar tak  The Great Gatsby TV series-a siam turin an thawk dun tih The Hollywood Reporter (THR) chuan an tarlang a, hemi atan hian writer Michael Hirst chu an thawhpui niin an tarlang bawk.

THR-in an tarlan dan chuan A+E Studios hian kum 10 chuang zet chu The Great Gatsby siamna atana phalna hi an nei tawh a, TV series-a an tichhuak a nih chuan a hit leh hle ang tih a rinawm. 'The Great Gatsby' novel hi kum 1925 khan  F. Scott Fitzgerald hian a tlangzarh tawh a, a hunlai chuan fak a hlawh lutuk lem lo. Mi ṭhenkhat chuan Fitzgerald-a lehkhabu ziah dang a tluk lo niin an ngai.

Kum 1926-ah khan a behchhan movie hmasa ber an siam nghal a, kum 1949 khan a film dang an siam leh nghal bawk. Hun a kal deuh a, kum 1974 khan British film director  Jack Clayton chuan film-ah siam lehin kum 2013 khan Baz Luhrmann chuan a rawn siam thar leh a, hei hi Mizo tam takin kan hriat ṭanna pawh a nih a rinawm.

Kum 2013-a an siam thar lehah khan Leonardo DiCaprio, Tobey Maguire, Carey Mulligan, Joel Edgerton, Isla Fisher, Jason Clarke, Elizabeth Debicki leh Jack Thompson-te an chang a, an film siamna budget pawh $mtd 105 lai niin a hlawhtling hle a, sum pawh $mtd 353.6 vel lai a lalut a ni. Academy award pawh pahnih lai an dawn phah bawk.

Tuna series-a an siam tum dan hi eng ang takin nge an kalpui dawn tih a hriat loh a, miniseries a ni dawn tih erawh THR hian an tarlang tel a ni.