Kristian film RAHBI en theih a ni ta

KṬP, Mission Veng Branch-in Kristian film an siam, 'RAHBI' tih chu December 30, 2019 zan khan an branch KṬP inkhawmah tlangzarh a ni a; nimin aṭang khan Youtube-ah a duh apiang en theiha dah a ni ta.

RAHBI hi Pathian thua mite kaihhruai theihna tur leh nun dan dik zawk neih theihna tur rilru pu chunga siam a ni a, Pathian thu nena inkaihhnawih a nih rualin, naupang, ṭhalai leh nu leh pate tan pawha hmuhnawm thei tura duan a ni.

He film hi thla 18 vel chhung an buaipui a; an buaipui ṭan tirh (June 2018) laia an branch leader Malsawmzuala'n tlangzarhin, nikuma an leader H Lalmuanpuia'n Pathian hnenah a hlân thung. December 30, 2019 zanah tlangzarh ni mah se, sound lamah siamṭhat zeuh ngai a awm avangin an khawih ṭha leh a; nimin khan mipui en theihin an pho chhuak ta a ni.

Mission Veng KṬP film hi sum tuak nana hman diltu KṬP branch leh pawl dangte pawh an awm nual a; mahse, an siamna rilruah sum tuakna atana hman chu remchang loah ngaiin, a duh apiang en turin an branch youtube channel 'KṬP Mission Veng Official' ah an dah ta zawk a. RAHBI hi Mizo mipui a tam thei ang berin en se, Pathian an hnaih phahna leh malsawmna an dawnna hmanrua a nih an duh ber thu Mission Veng KṬP hruaitute chuan an sawi.

RAHBI-a a changtunu ber hi Mimi C Rinpui a ni a, college-a zirlai niin, Pachhunga University College-a Miss ni lai mek a ni nghe nghe. Zodini (Mimi C Rinpuii) chu nula fel tak, kohhran mi tak ni mah se, a ngaihzawng nen an chesual a, natna khirh tak mai a kai zui a. Chu natna rapthlak tak mai avanga rilru na tak leh mangang taka a awm laiin, Pathian chhandamna ropui tak a chan dan lantir a ni.