Avora Records music video thar

Hornbill International Rock Contest 2017 winner Avora Records chuan Zirtawpni liam ta khan music video thar 'If You're Not Sweating To This Then Honey You're Not 90's' an tichhuak.

Avora Records hi ṭhalaite ril­rem zawng tak music play ṭhin an ni a, an hla tihchhuah thar pawh hi a music a nalh lehpek hle. Ruata Renthlei guitar solo nalh tak hi sawihmaih phal chi a ni lo ang.  

'If You're Not Sweating To This Then Honey You're Not 90's' music video hi a hmuhnawm hle a, Mizo ṭhalaiten social media lama kan hriat lar tak UBena pawh a inlan a, a zei lehpek hle a ni. 0389 star Christina Pautu a inlan bakah an model Chawngi hmuh a nuam bawk a, tunlai music video tihchhuah thar zinga hmun nuam ber pawl a ni.

Music video hmuhnawm tak hi Zorinpuia direct a ni a, a hla hi Avora Records siam niin,  Kings and Prophets Studios-ah recording hi tih a ni thung. 'If You're Not Sweating To This Then Honey You're Not 90's' music video hi siam a hautak hle a, thla hnih chhung vel zet an an buaipui. Avora Records vocalist, hranghlui zaithiam fam ta Zirsangzela Hnamte fapa Stephen Hnamte chuan an music video buaipui chu an hahpui hle tih leh Production team lam pawhin an thawkrim hle tih a sawi.

Hornbill Rock Contest winner-te hian tunah hian album an buaipui mek a, kumin chhung ngeiin tihchhuah hman an tum. Stephen chuan music video thar pawh kumin chhung ngei hian tihchhuah hman leh an tum tih Vanglaini a hrilh a, Avora Records fan-te tan chuan thu lawmawm a ni ngei ang. An album thar turah hian hla 10 a awm dawn a, an hla tihchhuah tawh dangte ngaihtuahin ngaihthlak a manhla hle turah beisei ila, kan tihsual a rinawm loh.