HONTRADE INTERNATIONAL ṬHAZUAL LENGZEM-ah HT Lalthanzami 'Di Rialin'

Hontrade International Ṭha­zual Lengzem-ah roreltu thar an awm a, chu chu tudang ni loin chart-a mikhual lo tak HT Lalthan­zami a ni a, a hla 'Di Rialin' hmangin Chart-ah No.1 dinhmun a rawn hauh a ni. Pahnihna chu chart hmasaa pakhatna Seraphic Choir 'Medley' niin, Fela Colney 'Tunlai Nula' chu pathumna a ni bawk.

HT Lalthanzami hla 'Di Rialin' music video hi May thlaa a tihchhuah kha a ni a, lengzem hla ṭha tak tak lo phuah tawhtu John Mawitea leh Mapuii Fanai-te phuah a ni a, a hit pawh hi thil mak a ni hran lo. Lalthanzami aw nen a inhmeh em em mai lehnghal a, hei hian a chawi lehzual hle a ni.

HT Lalthanzami hi Ṭhazual lengzem chart-ah hian a mikhual lo hle a, a hla dang ho pawh pakhatna a lo nihpui zak zak tawh. 'Di Rialin' pawh hi tihchhuah a nih hnu rei vak lo aṭang khan chart-ah a lang nghal a, hma sawn zelin chart hmasaah khan pathumna a ni. Tunṭumah erawh thlan hlawh ber niin pakhatnaah a rawn inhlangkai thei ta a, mipuiin an hlut hle tih a hriat.

Pahnihnaah hian chart hma­sa pakhatna Seraphic Choir 'Medley' chu a awm ve thung a, anni pawh hi chart-ah an lang rei tawh hle a, eng chen nge an la cham zel dawn tih chu hriat a chakawm tawh hle a ni.

'Sensiari' hitmaker Fela Colney chuan a hla thar 'Tunlai nula' hmangin hma a rawn sawn chak hle. Fela Colney hi 'Sensiari' a tihchhuah hnu khan a reh deuh vang vang a, thla riat vel zet a liam hnuah hla thar 'Tunlai nula' a rawn nei leh a, a hit nghal lehpek hle. Chart hmasaah khan a ṭumkhatna atan pasarihna a rawn ni a, a vawihnih lannaah pathumnaah a rawn inhlangkai nghal. 

Fela zai hi ngaihthlak a nuam a, a hnehsawh bawk a, thlan a hlawh nghal hle a ni. Chart-a pakhatna pawh lo ni tawh Priscilla Fanai 'Ka duh leh duh loh' chu palina a ni ve thung a, KR Robert 'Hello' chuan a dinhmun ngai luah lehin panganaah a awm leh.