Ozzy Osbourne 'Ordinary Man' album a chhuak ta

Ozzy Osbourne chuan a album thar 'Ordinary Man' chu nimin khan a tlangzarh ta a, streaming service hrang hrangah ngaihthlak theihin a awm ta.

Ozzy hian kum 10 chhung lai album a tihchhuah tawh loh hnuah 'Ordinary Man' hi a tichhuak leh a, Kum 2010-a a tihchhuah 'Scream' chhunzawmna kha a ni. Tunhnaiah a hriselna ṭhat loh thu chhiar tur awm zeuh zeuh mah se a album thar erawh tluang takin a tichhuak thei thung. Mahse a North America tour neih tur erawh a hriselna ṭhat loh avangin a ṭhulh a, Switzerland lamah enkawl a ni dawn.

'Ordinary Man'-ah hian track 10 a awm a, bonus track pakhat a awm bawk. Hla pali lai chu single-in a ti chhuak tawh a ni. Nikum November thla khan Under the Graveyard leh Straight to Hell-te a ti chhuak a, January thla khan a title track Ordinary Man chu tlangzarh lehin Ningani khan 'It's a Raid' a  dah chhuak leh bawk.

'Ordinary Man'-ah hian Post Malone pawh a thawhpui a, Elton John pawh a thawhpui bawk. A title track 'Ordinary Man' hi Elton John nen an sa dun a, Post Malone nen hian 'It's a raid' leh 'Take What You Want'-ah an thawkdun a ni.   

'The Prince of Darkness'

A hming lema 'The Prince of Darkness' an vuah Ozzy hi kum 71 lai a ni tawh a, nupui pahnih nei tawhin fa paruk a nei bawk.

Black Sabbath vanglai aṭanga vawiin thlenga thawm nei lian thei a ni a, rock music huang­chhungah chuan 'legend' tia sawi ngam a ni. A band ṭhin Black Sabbath hi mi tam tak chuan heavy metal music ching chhuaktu ang hialah an chhal. Rock star a nih angin a lifestyle pawh a 'rocker' hle a,  Black Sabbath-a a member puite chuan Kum 1979 khan zu leh ruihhlo a tih nasat lutuk avangin an ban hial.

Solo-a a kal zui hnua a album tlangzarh zawng zawngte pawh a hlawhtling em em vek a, chawimawina a dawn tawh pawh a tam tham hle. 

'Ordinary Man' track list

1.     Straight To Hell (feat. Slash)

2.     All My Life

3.     Goodbye

4.     Ordinary Man (feat. Elton John)

5.     Under The Graveyard

6.     Eat Me

7.     Today Is The End

8.     Scary Little Green Men

9.     Holy For Tonight

10. It’s A Raid (feat. Post Malone)

11.     Take What You Want (Post Malone feat. Ozzy Osbourne and Travis Scott)