Lana Del Rey-i'n aw ṭhat loh vangin European Tour a ṭhulh

Lana Del Rey chuan Europe lama 'The Norman F**king Rockwell' tour a neih tur chu a taksa hrisel lohna avangin chawpchilh takin a ṭulh.

Ruahmanna siam sa ang chuan 'Summertime Sadness' hit maker hi Ningani zan aṭanga Ziggo Dome, Amsterdam-a tour nei ṭan tur a ni a, chumi zawhah France, UK leh Germany pan tur a ni. Mahse Ningani khan thuchhuah siamin a damlohna in a aw lamah nghawng a neih avangin tour a neih tur chu a ṭulh a ngai ta tih a sawi.

"Hun tepter tawh taka mi zawng zawng ka tihnual hi pawi ka ti hle mai, mahse ka damlohna hian ka rin loh takin nghawng a nei a, ka zai theihna ka aw ka hloh vek a. Doctor-in kar li tal chawl rih turin thurawn min pe a ni," a ti.

March 27 aṭanga  Santiago, Chile-a show a neih turah erawh a inlan leh theih tawh beisei a ni a, kumin nipui chhung hian North America leh Europe ram hrang hrangah show inlan tur a ngah hle. Glastonbury-a British music festival-ah pawh a inlan dawn a ni.

Lana Del Rey hian nikum August 30 khan a studio album parukna Norman F**king Rockwell hi a tlangzarh a, a hlawhtlinpui leh hle a; ram hrang hrang music chart-ah No.1 a nihpui a ni. Billboard 200 album chart-ah pawh pathumna  a nihpui tawh a, US-ah ringawt pawh album-equivalent unit 1,04,000 zet a hmu.