MPL Kickoff-ah Mizoram hmuh ngai loh lighting!

Delta Sound neitupa Partlana chuan September 5 zana Lammuala Mizoram Premier League Kickoff neih hunah Mizorama la hmuh ngai loh light leh sound chhawpchhuah a tum thu a sawi. MPL Kickoff-ah hian ennawm hmuhnawm leh ngaihnawm hrang hrang a awm ṭhin, kumin chu Lammualah neih a ni dawn a, a hmuhnawm leh ngaihnawm dan a dang dawn niin a lang.

Delta Sound neitupa Para chuan,"Hetiang platform hi Mizoram tan ka awm ve ṭhin em em a, stage set up bakah light leh sound arrangement pui tak Mizoramin a la hmuh ngai loh MPL Kickoff-ah kan hmu dawn a ni," a ti. MPL Kickoff hi zana hman tur a nih avangin a light arrangement hmuhnawm tak mipui entir a tum.

Zaithiamte pawh an phur khawp mai- DJ Lalvenhimi chuan,"2019 MPL Kickoff  hi kum danga la tih ngai loh angin Lammualah neih a ni tur hi ka phur hle a, artist la zai ho ngai miah lote an perform dawn bawk a, match hmuhnawm tak in a zui bawk ang. Lo kal vek turin mipuite kan sawm a che u," a ti.

DJ-i ang bawka 'Ni e maw' hla sa ve tur Amte-a chuan, "Superbowl-te leh World Cup opening ceremony-te rualawt deuhin kan lo en ṭhin a, chutiang chu khaikhin phak ni lo mah se, kan ram chhunga sporting event-a entertainment hun ṭha kan hmang ve tur hi a lawmawm ka tiin ka phur tawh hle a. Music leh sport-te  hmun khata inlungrual taka kan hmu ho thei tur hi hmasawnna ropuiah ka ngai," a ti.

Zaithiam zingah MPL Kickoff hi 'hmang ṭangkai' an lo awm tawh a nih ngai chuan, Feli Fanai aia MPL Kickoff hmangthiam hi an la awm kher awm lo e- 'Pheichheh mawi' hla tlangzarhna tana MPL6 Kickoff kha hman a ni a, a thawm nat zia kan la hre reng ang.

Feli Fanai chuan,"Hetiang hun ropuia perform tura min sawm hi ka lawm takzet a, theihtawp ka chhuah dawn a ni. Kan performance arrangement hi a ropui dawn khawp mai a, a hmunah leh TV lamah lo thlir nge ngei turin kan sawm a che u,"  tiin Jerry, Michelle Varte, Amtea, DJ-i leh Jaui-te nen an zaiho tur chu a phur tawh hle.

MPL Kickoff hi September 5 zan dar 6:30-ah Lammualah neih tur a ni.