Box Office-ah Angel Has Fallen khum thei la awm lo
Box Office-ah thil thar em em hmuh tur a awm lo a, Top 10-ah film thar lutuk hmuh tur a awm lo. Chart hmasaa pakhatna Angel Has Fallen khum thei an la awm lo a, kartawp Box Office-ah khan sum lalut tam ber a la ni pha.
Angel Has Fallen a tlahniam lo
August 23 khan tlangzarh a ni a, ni thum chhung lekin Box Office-ah roreltu a ni hman. Fallen series pathumna Angel Has Fallen hi a hmuhnawm dawn tih a hriat a, Olympus Has Fallen (2013) leh London Has Fallen (2016) chhunzawmna a nih avang hian enchaktu an tam tih a hriat.
Ric Roman Waugh-a direct niin, a film hi minute 121-a sei a ni. He film siamna atan an budget chu $mtd 40 a ni a, tunah hian khawvel pumah $mtd 72.6 an hmuchhuak tawh. Kar tawpah khan North America-a theatre 3,336-ah chhuah niin, $11,842,000 a la lalut phak a, khum thei an la awm lo a ni.
Chart-a danglam tam lo The Lion King a invawrh leh
Tunkar chart-ah hian thil inthlak danglam nasa tak hmuh tur a awm lo a, chart hmasaa pahnihna Good Boys bawk pahnihnaah a awm leh. Good Boys nuihpuitu an la tam a, kartawpah khan $9,500,000 an la hmuhchhuak phak a ni.
The Lion King (2019) chu chart hmasaah khan panganaah a awm a, tun chart-ah hian pathumnaah a rawn invawrh leh. Hetihlai hian pahnihna Good Boys nen erawh an sum lakluh a la inthlau hle thung. Tunhmaa naupang lawm tur nia kan ngaih ṭhin kha naupang chauhin an en lo tih a hriat a, Hobbs & Shaw-te pawh a rawn khum leh phak hial.
Fast & Furious Presents: Hobbs & Shaw chuan a dinhmun ngai luahin palinaah a ni a, a sum lakluh erawh a tlahniam ve hret hret. Theatre 2,972-ah chiah chhuah a ni a, Lion King hi theatre 3,190-ah chhuah a ni thung. Ready or Not chuan hma sawn hretin parukna aṭangin panganaah a rawn inhlangkai ve bawk.
Christian Movie Overcomer chu pathumna aṭangin paruknaah a tla thla. Hei hi theatre 1,827-ah chiah chhuah a nih vang niin a lang a, Top 10 langphak zingah theatre chang tlem ber a ni a, a dinhmun a chhe lutuk lo tih hei hian
a tilang.
Box Office Top 10
1 Angel has Fallen $mtd 11
2 Good Boys $mtd 9
3 The Lion King (2019) $mtd 6.7
4 Fast & Furious Presents: Hobbs & Shaw $mtd 6.3
5 Ready or Not $mtd 5.8
6 Overcomer $mtd 5.6
7 Scary Stories to Tell in the Dark $mtd 5
8 Spider-Man: Far from Home $mtd 4.3
9 The Angry Birds Movie 2 $mtd 4.2
10 Once Upon a Time in Hollywood $mtd 4.1