Hlimhlimi leh Maruati hla thar zaninah

Tunlai Gospel singer hmei-chhe zinga huhang ngah ber pahnih Hlimhlimi leh Maruati te chu an thawk dun a, zanin hian hla thar an tichhuak dawn.

Hlimhlimi leh Maruati hla thar tur hi 'Uain Thar' tih a ni Nehemia Chhangte phuah niin Muanpuia Renthleiin music a siam sak a, video chu BS Picture kut chhuak niin video hi Chanmari Presbyterian Biak-ina an siam a ni a, wardrope chu Mary leh Chawndenghandloom-te niin Tetei Renthlei leh makeupby-lanfel te chuan makeup buaipuitu an ni thung.

"He hlaah hian Pathian Thlarau Thianghlim awmpui thlakhlelhna leh Pathian thua kan hmuh hun tawp lama in fanute'n in fapate'n ka thu an hril ang, tih ang a ṭhlalaite'n Pathian thu an au chhuah puina chungchangte a tarlang tel a. Pathian hla ṭha tak mai sa dun theia kan awm chu lawmawm kan ti hle a, hun duhawm zawk neih zel chakawm kan ti hle a ni," tiin hla an tichhuah dun chungchang hi an sawi.

Hla phuahtu chuan, "He hla hi ṭhangthar chhuante leh chhuan awm zel turte tan malsawmna lo chang se tih hi kan duhthusam ber a ni. "'Luka 5:37' thu hmanga Lalpa min pawlna a ni a, Krista thisenin ṭhangthar lo awm mekte a thlak danglamna hla a ni ber, kan Lalpa Isua Krista hmingin mi tamtak tan Thlarauvah malsawmna lo chang ngei rawh se," tiin Nehemia chuan a sawi ve bawk.

Hlimhlimi leh Maruati hi Zoram rimawi khawvela chuan inhmelhriat nawn tir ngai lo ber  zinga mi an ni a, a mimal pawha zai thiam tak ve ve khan hla an tichhuak dun dawn a ni a, beng an titlai hle ang. 'Uain Thar' hi MDM library-a dahluh tawh niin zanin hian Zonet lamah thlira ngaihthlak theihin tih chhuah a ni dawn a, karleh lamah MDM YouTube channel-ah an dah dawn bawk a ni.