The Show en turin inring ṭan rawh le

People magazine-in 'hottest girl group on the planet right now' tia an sawi, K-Pop girl band Blackpink premium livestream concert YouTube-a en theih hun tur chu a hnai tawh hle. Pathianni mai hi a ni ta.

BLINK ho an phur a, an mit pawh an khap ngam tawh lo. Rolling Stone-in tunhnai lawka an kawmnaah Jennie, Jisoo, Rosé leh Lisa-te chuan an fan-te an concert kaltlang hian an surprise dawn tih an sawi a, hemi bak hi chu an sawi lang duh vak lo. December thla khan Jennie chuan an fan-te an barakhaihna tur chu thuruk a la nih thu a sawi.

Jisoo chuan hla 15 aṭanga 20 vel an setlist-ah an dah tih a lo sawi tawh a, heng zinga hla pariat hi chu THE ALBUM-a mi kha a ni dawn.  Mizo zingah pawh an concert ticket lei hi an awm nual tawh ang tih a chiang a, nikum December thla tawpa concert neih an tum tawh kha ni mah se South Korea-ah hri kai an pun leh avangin an tikhawtlai a ni. 

Blackpink hi 'The Late Late Show with James Corden'-ah nimin khan an inlan a, hetah hian an concert neih tur chungchang leh an stage vel tihlan an tum.

June 22, 2017-a an tlangzarh an music video 'As If It’s Your Last' kha nimin khan YouTube-ah mi maktaduai 950-in an thlir tling tawh. An music video, YouTube-a an dah thlirtu mtd 950 an neih tlin palina a ni. Kum thum, thla sarih leh ni nga chhungin hetiang zat thlirtu hi an nei hman.

'How You Like That' kha mi mtd 750 chuangin an thlir tawh bawk a, K-Pop Girl Group zinga 750 million view hit rang thei ber an ni bawk.

Thawhṭanni khan Rosé chuan solo-a a tihchhuah tur Coming Soon teaser a tichhuak a, Blackpink YouTube channel-ah en tur a awm. Second 30 leka thui video hian BLINK ho a tiphawkleka, en hlan an ngakhlel.