Brit Award dawng thei tur zingah Dua Lipa langsar

Kum tina sem ṭhin, rimawi lama chawimawina sang British Record Industry Trust (BRIT) Award chu February thla hian sem a ni leh dawn ta a, Nominee pawh puan a ni leh ta. English singer Dua Lipa chu award dawng thei tura chawpchhuah zinga langsar ber a ni a, chawimawina pawh a dawn leh ngei a  rinawm. 

Dua Lipa hian nikum khan award hlu tak tak - British Female Solo Artist leh British Breakthrough Act-te a dawng a, kuminah pawh category pali-ah a hming a lang leh a ni. 

Kum 23 mi British singer hian Scottish DJ, Calvin Harris thawhpuiin nikum May thla khan 'One Kiss' a tichhuak a, a lar vet vet hle. A hla hit tak avang hian hlawhtlinna tam tak a lo chang tawh a, a chang mek zel bawk. 

Dua LIpa hi Brit Award-ah hian category pali-ah a hming a lang a, mimala langsar ber tih ngam a ni. Nominee puan a nih ruala ngaihven hlawh ber pawh a ni a, kum hmasa angin hlawhtlinna a chang leh thei angem tih chu hriat thuai a ni dawn. 

A hla hit 'One Kiss' hi British Single leh British Video huangahte a lang a, Annie-Marie chu a elpui tur bera ngaih a ni. A hla hit dang 'IDGAF' chu category pahnihah chawpchhuah a ni bawk. 

Dua Lipa hi nikum khan British artist zinga zawn hlawh ber a ni a, Spotify leh Apple Music lamah a ni aia chungnung an awm lo. A hla hit 'One Kiss' chu Drake 'God's Plan' tih loa mipuiin an ngaithlak nasat ber a ni bawk. A hming chawia album a tichhuah 'Dua Lipa' pawh album hit zual top 3-ah a lang cheu bawk. 

'New Rules' singer Dua Lipa hi Vogue chuan January thla cover girl atan an hmang bawk.

 

Brit Award nominee puan a nih ruala hming langsar tak pakhat chu Anne-Marie a ni. Kum 27 mi Anne-Marie Rose Nicholson hi - Dua Lipa leh Jess Glynne-te nen huang khatah awmin, award pali la thei dinhmunah an ding mek. 

Award ngaihlut tak tak - British Female Solo Artist, Mastercard British Album of the Year, British Single leh British Artist Video of the Year-ahte a lang a, award pawh a dawn ngei a rinawm. 

Jess Glynne chu boruak nei lian ber zinga mi a ni bawk a, a hla hit 'I'll Be There' hmangin British Female Solo Artist leh British Single-ahte award dawng thei tura chawpchhuah a ni. Anne-Marie hi UK chart hrang hrangahte a thleng sang viau a, chawimawina dawngtu zingah a tel a nih pawhin a mak lo ang. 

Khawvel huapa zaithiam lar tak tak - Drake, Eminem, Shawn Mendes leh Travis Scott-te chu International Male Solo Artist huangah an lang bawk. Hmeichhe lamah - Ariana Grande, Camila Cabello, Cardi B leh Janelle Monae-te chu nominee zingah an lang bawk a, International Group huangah - Beyoncé & Jay Z 'The Carters' leh First Aid Kit-te chu chawpchhuah an ni bawk. 

Brit Award 2019 hi February 20 khian O2 Arena, London-ah sem a ni ang.