Critic's Choice Award sem a ni ta

Lemchan khawvela chawimawina semchhuah ṭhin zinga pakhat, Critic's Choice Award chu nimin zing khan Santa Monica, California-ah sem a ni leh ta a, Lady Gaga pawh award dawngtu zingah a tel. 

'A Star Is Born' star Lady Gaga hi Best Actress award hlan a ni a, he chawimawina hi American actress Glenn Close nen an la dun a ni. Mipa lamah British actor Christian Bale chu Best Actor atan thlan a ni a, Best Picture award chu drama film Roma in a la ve thung a ni. 

American singer Lady Gaga chuan lemchan lamah pawh a duai lo tih a lantir nawn leh ta a, film lama chawimawina ṭum hnih a dawnna a ni ta. Tun hnai khan a vawi khat nan Golden Globes award a la a, film lama chawimawina ngaihlut tak pakhat Cri­tic's Choice Award hlan a ni leh ta bawk. Heng chawimawinate hi 'A Star Is Born' avanga a lakte an ni. 

Kum 32 mi Gaga hi 'A Star Is Born'-ah hian American actor Bradley Cooper nen an inkawp fuh hle a, an hla sak dun 'Shal­low' pawh Best Song atan ṭum hnih thlan a ni ta bawk. 

Nikum January thla-a tlangzarh Black Panther chu Critic's Choice Award-a langsar ber pakhat a ni a, award pawh a la nual. Best Visual Effects a lak bakah, Best Production Design leh Best Production Design-te a la bawk a ni. 

Green Book star Mahershala Ali chu Best Supporting Actor atan thlan a ni a, American actress Regina King chuan Best Supporting Actress a la ve bawk. Roma film siamtu Alfonso Cuaron chu Best Director award hlan a ni a, Alfonso Cuaron chuan Best Cinematography  a lakpui bawk. Roma hi a che ṭha hle a, Best Foreign Language Film award pawh a la bawk a ni.

Spider-Man: Into the Spider-Verse chu Best Animated Feature atan thlan niin, award ngaihhlut berte zinga mi Best Action Movie chu Mission: Impossible - Fallout in a la ve thung a ni. 

Critic's Choice Award hi American actor Taye Diggs chuan a host a ni.

Best Picture    :    Roma

Best Actor    :    Christian Bale 

Best Actress    :    Lady Gag & Glenn Close 

Best Director    :    Alfonso Cuaron 

Best Visual Effects    :    Black Panther

Best Animated Feature    :    Spider-Man: Into the Spider-Verse

Best Action Movie    :    Mission: Impossible - Fallout

Best Comedy    :    Crazy Rich Asians

Best Sci-Fi or Horror Movie    :    A Quiet Place

Best Foreign Language Film    :    Roma

Best Song    :    Shallow (A Star Is Born)