Chris Pratt leh Katherine an inhual

American actor Chris Pratt leh a kawppui Katherine Schwarzenegger-te chu an inhual ve leh ta. A nupui hmasa nena inṭhen hlim hlawl Chris Pratt hian an inhual thu hi nimin khan social media lamah a tarlang a ni. 

Kum 39 lai ni ve tawh Pratt chuan, "Sweet Katherine, 'Yes' tia min chhang avangin ka lawm e, nang nei tur hian ka phur tawh tak zet a ni," tiin Instagram-ah a post a, an thlalak dunna a tarlang tel bawk. Pratt hi Hollywood star zinga hriat hlawh berte zinga mi niin, a channa - Guardians of the Galaxy leh Jurassic World-te phei chu a lar vet vet hle. 

Hetih lai hian a nupui hual Katherine Schwar­zenegger erawh author a ni thung. A pa chu Austrian-American actor lar Arnold Schwarzenegger a ni a, a nu chu journalist Maria Shriver a ni. 

Guardians of the Galaxy star, Chris Pratt hi kum 2019 khan American actress Anna Faris nen an innei a, fa pakhat an nei. Anna Faris nen hian 2017 khan an awm hran thu an puang a, nikum November thla khan an inṭhen fel chauh a ni. 

Katherine nen hian nikum June thla vel aṭang khan an inkawp ṭan a, thla tam pawh a vei hmain an inhual ve leh ta a ni.