Super Bowl Halftime Show-ah perform tur Maroon 5

Khawvel ennawm ropui berte zinga mi Super Bowl Halftime Show chu February thla hian a thleng leh dawn ta a, perform turte pawh puanchhuah a ni leh ta. American pop rock band lar Maroon 5-te chu he show ropuiah hian an perform dawn a, American rapper Travis Scott leh Big Boi-te an che dawn bawk. 

Super Bowl LIII Halftime Show-a perform tur hian - Rihanna, Adele, JAY-Z, Pink leh Cardi B-te hming pawh lam rik a ni a, mahse chi inthliarna kaihnawih avangin sawmna hi an lo hnar tawh a ni. Anni bakah hian zaithiam lar tak tak hming lam rik a ni a, a tawpah Maroon 5-te leh American rapper Travis Scott leh Big Boi-te hi perform tura thlan an ni ta a ni. Mipui hmuhchak ber tura ngaih chu Maroon 5-te an ni. 

American football game ngaihhlut hlawh National Football League (NFL) championship hi February 3-ah khelh a ni dawn a, Halftime Show bawn tak en tur a awm leh dawn a ni. Super Bowl LIII hi Mercedes-Benz Stadium, Atlanta-ah khelh a ni ang.