Box Office: Aquaman ngam loh The Upside
American actor Jason Momoa channa Aquaman chuan Box Office-ah ngam loh a tawng ve ta. Hun eng emaw chen dinhmun sang ber luah tawh Aquaman hi January 11-a tlangzarh The Upside chuan khumin, sum lalut hnem ber a rawn ni ve leh ta a ni.
He drama/comedy film hian tun weekend chhung khan $mtd 19.6 zet a lalut a, Aquaman hian $mtd 17.3 a la lut ve leh bawk. A Dog's Way Home chu pathumna a ni a, Spider-Man: Into the Spider-Verse leh Escape Roomte chu top 5-ah an lang bawk.
The Upside
American comedian Kevin Hart leh Australian actress Nicole Kidman-te channa a nih miau avangin dahniam chi a ni lo va, roreltu a rawn ni thei pawh hi a awm viau a ni. Tun hnaia film chhuak thar zingah chuan ngaihven hlawh berte zinga mi niin, sum pawh a lalut hnem hle a ni.
North America lamah chuan thawm nei lian ber a ni mek a, tlangzarh kara a sum lakluh ($mtd 19.6) pawh a chhe lo. STX Entertainment film tichhuah tawh zinga Box Office-a No.1 hauh nghal thei hmasa ber a ni nghal bawk a, 2016-a tihchuah Bad Moms ($mtd 23.8) tih loha tlangzarh kara sum hailut hnem ber a ni cheu bawk.
Aquaman a ropui
Box Office-ah hun rei tak chhung ro a rel a, DC Extended Universe superhero film zinga $tld 1 lalut tling hmasa ber a ni bawk. Jason Momoa leh Amber Heard-te channa Aquaman hian tlangzarh aṭanga thla khat chhung lekin record hi a siam a, 1 billion dollar club-ah ziah luh a ni ta a ni.
Aquaman hi North America bakah khawvel hmun hrang hrangah chhuah a ni tawh a, China pawh a thleng tawh a ni. Hei hian a sum lakluh pawh nasa takin a tipung a, $mtd 200 vel senga an siam hian $tld 1 chuang zet a la lut der tawh.
Tun hnaia film chhuak thar A Dog's Way Home chu sum lalut tam pathumna a ni a, beisei anga che ṭha tawk lo Spider-Man: Into The Spider-Verse chu palina a ni. Shameik Moore, Jake Johnson leh Hailee Steinfeld-te channa Spider-Man hian kar liamta chhung khan $mtd 9 a lalut leh a, a sum lakluh tawh zawng zawng chu $mtd 302 a tling tawh a ni.
Escape Room chu sum lalut tam pangana niin, a hnuiah hian Mary Poppins Returns leh Bumblebee-te an awm a, On the Basis of Sex, The Mule leh Vice-te chu top 10-ah an lang bawk.