'Queen of Instagram' Selena Gomez Thla thum hnuah account tinung leh ta

'Queen of Instagram' an tih mai American singer Selena Gomez chuan thla thum chuang zet Instagram account a tihtawp lailawk hnuah, Thawhṭanni aṭang khan a IG account hi a tinung leh ta. 

Selena hian nikum September 5 khan a account hi a titawp lailawk a, a chhan chiang tak erawh tarlan a ni lo. Amah lamah harsatna eng eng emaw a nei a, a hriselna dinhmun pawh a ṭha vak lo. Rilru lamah buaina a neih avangin rehab-ah pawh hun eng emaw chen a awm a, hengte avang hian social media lamah pawh a active meuh lo a ni. Rehab aṭanga a chhuah hnuah ngai a awh leh ṭan tawh a, social media pawh a khawih ṭan ve leh ta a ni. 

Kum 26 mi Selena chuan, "Kum thar chibai ka buk a che u, in mi duhsakna leh hmangaihna avangin lawmthu ka sawi e" tiin Instagram lamah a tarlang. Kum 2018 chu a tan hun khirh tak a nih thu leh, harsatna tam takin a tlakbuk thu pawh a sawi a, beiseina sang tak nen kumbul a ṭan chho leh mek tih a sawi bawk. 

'Queen of Instagram' Selena hi follower nei tam lamah footballer lar Cristiano Ronaldo chuan a khum tawh a, follower maktaduai 151 zet a nei a ni. Selena hian follower maktaduai 144 neiin pahnihna a hauh a, American singer Ariana Grande (142 million) chu pathumna a ni. 

Hetih lai hian Selena hi IG aṭanga sum lakluh kawngah pawh Reality TV star Kylie Jenner chuan a khum tawh a, ṭan lak a ngai viau a ni.