Alicia Keys Grammy Award a host dawn

Grammy Award ṭum 15 zet lo dawng tawh, Alicia Keys chuan kumina Grammy Award sem leh tur a host ve thung dawn. American singer hi zaithiam zinga he chawimawina dawng hnem berte zinga mi a ni a, award ceremony a host tur pawh hi a hlu zual ngei ang. 

Kum 37 mi lai ni ve tawh Alicia Keys chuan tun hnai khan video clip a tichhuak a, Grammy Award a host tur thu hi a puang a ni. 'No One' singer chuan, "61st Annual Grammy Award host tura min thlang hi ka lawm hle a, chawmawina ropui tak a ni. Mi ṭha tam tak an awm laia kei min thlang hi a mak ka ti a, ka phur tawh takzet a ni," tiin a sawi. 

Video clip hi minute kua-a sei niin, a manager, Johnny Wright-a'n host tura an sawmna a va hrilh laia a lawm zia leh, au vak chunga a lam velte pawh tih lan a ni. A hun laia zaithiam lar berte zinga mi  Alicia Keys chuan, "Music khawvela chawimawina hlu bera hmun pwimawh tak ka chan avang hian ka lawm a, stage-a chettlat hlan ka nghakhlel tawh takzet a ni. Nominnee zingah hmeichhia an ṭhanhem hle a, hei hian mi tiphur hle bawk - February 10-ah kan inhmu dawn nia," tiin a phur thu a tarlang bawk. 

Record nei ṭha Alicia 

Alicia Keys hian kum napangte ni chhungin Grammy Award a dawng a, 2002 khan Best New Artist atan thlan a ani. Hetih lai hian kum 21 mi chauh a ni a, award hlu tak tak panga zet a hum haw a ni. 

Best New Artist bakah hian - Song of the Year, Best Female R&B Vocal Performance, Best R&B Song leh Best R&B Album-te a dawng a, Record of the Year dawng thei tura chawpchhuah zingah a tel bawk. 

Kum 2005 khan category 10 zetah a hming a lang leh a, hemi ṭum pawh hian - Best R&B Album, Best Female R&B Vocal Performance, Best R&B Performance by Duo/Group leh Best R&B Song-te a la leh a ni. A kum lehah erawh award dawng thei tur zingah chhawpchhuah ni mah se chawimawina dawng zingah a tel lo thung.

 

Kum 2008 khan Best Female R&B Vocal Performance leh Best R&B Song-te a la leh a, 'Super­woman' avangin Best Female R&B Vocal Performance award a dawng bawk. Jay-Z nena an hla hit 'Empire State of Mind' zarah Best Rap/Song Collaboration leh Best Rap Song-te a la leh bawk. 

Grammy Award a dawn hnu­hnung ber chu 2014 niin, a studio album pangana 'Girl on Fire' chu Best R&B Album atan thlan a ni a, 2015 khan Album of the Year nominee zingah tel lehin award erawh a la pha ta lo a ni. 

Alicia Keys hi ṭum 29 zet Grammy Award nominee a lo ni tawh a, chung zinga 15 chu a hui a ni. Chung zingah chuan award ngaihhlut tak tak - Album of the Year, Record of the Year, Song of the Year leh Best New Artist-te a tel. 

Grammy Award hi February 10 khian a vawi 61 nan STAPLES Center, Los Angeles-ah sem a ni dawn a, Kendrick Lamar chu hming langsar ber a ni. Lamar hi category pariat zetah a lang a, Candian rapper Drake (7) chuan a dawt a ni. Award dawng thei tura chawpchhuah zingah hian - Cardi B, Childish Gambino, Lady Gaga leh Maren Morris-te chu an langsar viau bawk.