India Box Office Uri : The Surgical Strike a hit ber

Tun hnaiah Bollywood film chhuak thar a awm nual a, chung zinga hit ber chu Uri : The Surgical Strike a ni. He film hi kum 2016-a India sipai ten Pakistan ram chhunga hel laka beihpui an thlak 'Surgical Strike' behchhana siam khan niin, mipuiin an hlut hle. 

Indian actor Vicky Kaushal leh Mohit Raina te channa hi January 11 khan tlangzarh a ni a, Bollywood a dengchhuak hneh hle. Tlangzarh ni hian cheng vaibelchhe 8.20 zet a lalut a, India ram hmun hrang hrangah hralh a tla hle a ni. Tun weekend chhung khan vbch 35.73 zet a lalut a, release aṭanga ni nga chhunga  sum lakluh chu vbch 50 chuang zet a ni. Khawpui hrang hrangah chhuah chhoh mek zel a nih avangin a sum lakluh hi a pung chak hle a ni. 

Uri : The Surgical Strike hi Indian film director lar Aditya Dhar kutchhuak niin, Yami Gautam leh Kirti Kulhari te pawh a changtu zingah hian an tel a ni. Kumina film chhuak thar The Accidental Prime Minister leh Rajinikanth channa Petta te nen Box Office-ah an inel mek a, sumlakluh kawnga che ṭha ber erawh Uri : The Surgical Strike hi a la ni fan a ni. 

Kum 2016 September 18 khan Jammu and Kashmir-a Indian army headquarters chu Pakistan firfiakte'n an bei a, sipai 18 an thi a ni. He thil thleng hi India sipai te chuan rang takin an chhang let a, pawilhawihtu firfiak mi pali te chu darkar ruk vel zet an beihlet hnuah an kaphlum vek a ni. 

Firfiakten an beih hi India - Pakistan rami dep Line of Control bul, Uri-a 12th Brigade headquartes a ni a, grenade leh silai hmangin an bei a ni. Heng firfiakte hi LoC-a leiverh aṭanga kalin, ramri hungna an zaichhiat hnuah Kashmir-ah hian an lut a ni. 

India sipai te chuan Pakistan hel te chet dan hi enliam mai an tum hauh lo a, a na thei ang bera chhanlet an tum ta a ni. Tichuan, September 28 khan Indian Army te chuan Control (LoC) pelin Pakistan ram chhunga firfiakte lakah beihpui an thlak ta a, firfiak ṭhahnem tak an kaphlum a ni. 

He thil thleng rapthlak tak mai hi, Indian film director Aditya chuan remchangah lain film-ah a siam ta a ni. Vicky Kaushal chu Major Vihaan Shergill lemah changin, India Special Forces te a kaihruai a, an che vela pui riap riap hle. Film-ah hian sipai nunna chante, chawimawina ropui nena thlahliam an ni lai pawh atrlan a ni bawk. 

Uri : The Surgical Strike hi a taka thil thleng behchhana siam a nih avangin mipuiin an ngaihven a, en pawh a hlawh hle a ni.