YouTube-in prank video ṭhenkhat paih

YouTube chuan inthenfai hna an thawk a, prank video him lo eng emaw zat an paih. Hemi rual hian K-pop music video ṭhenkhat pawh copy­right chungchang avangin paih an ni a, a hnuah a pangngaia dahlet leh an ni. 

YouTube chuan prank video tam tak chu mipui tana enhim lo leh thil ṭha lo thlen theite an nih avangin paih an ni a, a bikin nunna atan pawi thei leh inhliamna thlen thei thil te chu paih a nih thu an tarlang. Video ṭhenkhat chu en him lo tak tak te an ni hlawm a, nunna chan phah hial pawh an awm thu an sawi. Hei vang hian video eng emaw zat chu remove a ni a, "An tan YouTube-ah hmun a awm lo a ni," tiin, an tarlang. 

YouTube hian tunkar Thawhlehni khan K-pop muisc video eng emaw zat chu en theih lohin an dah a, a hnu darkar khat leh a chenve velah a pangngaiin an dahlet leh. Hei hi copyright chungchanga Aiplex Private Software Limited ten thubuai an thehluh vang niin an sawi. Video an block sak zingah hian - BTS, BLACKPINK leh BIGBANG te pawh an tel a, PSY 'New Face' pawh a bang bik lo a ni.