Mipa aia hlawh tlem nih duh lo Deepika Padukone

Film khawvela buaina lian tak pakhat chu - mipa leh hmeichhia hlawh inthlau lutuk chungchang hi a ni. Hei hi Hollywood-ah chauh a ni lo va, Bollywood-ah pawh a danglam chuang lo. 

Hemi chungchang hi tun hnai khan Bollywood star Deepika Padukone pawhin a sawichhuak a, hlawh inthlau avang hian film eng emaw zat chu a hnar tih a sawi chhuak mauh mai. 'Padmaavat' star chuan, "Film hlawhtlinna hi a changtuteah thui tak a innghat a, mipa leh hmeichhia kan pawimawh dan a inang reng. Kan hlawh pawh a inang tur a ni a, mipa ten an hlawh hnemna bik tur awmin ka hre lo," tiin a sawi hmiah mai a ni.   

Kum 33 mi Deepika chuan sawi zawmin, "Ka channa film tam tak ka en let a, ka hlutna pawh ka hre chiang hle. Mipa ten an hlawhhnem avangin film a hlawhtling ngawt lo va, hmeichhia te hi kan pawimawh a ni. Tuna kalphung hi chu a 'fair' lo tak zet," a ti. Bollywood leh Hollywood thlenga tawnhriat nei ṭha Deepika chuan, "Mipa aia hlawh tlem lutuk turah min ngaih a nih chuan an tisual ang, hlawh chungchang avang hian film eng emawzat chu ka lo har tawh a ni," tiin, a sawi bawk. 

Deepika Padukone hi film lar tak tak - Padmaavat, Bajirao Mastani, Yeh Jawaani Hai Deewani leh Chennai Express ahte a lo chang tawh a, Bollywood star zinga hlwh hnem ber te zingah a mi a ni. Nikum khan Ranveer Singh nen an inei a, film khwvelah a zuanglut leh hnai tawh niin an sawi.