Zanin MPL Kickoff-ah

Lammualah lam ennawm, zai ngaihnawm leh inkhel hmuhnawm a awm kawp vek dawn - zanin dar 6:30 hian Mizoram Premier League Kickoff neih a ni dawn a, Mizo zaithiam langsarte an inlar ang a, lamthiam kan hmu ang a, jersey display nghahhlelhawm tak a awm ang a, inkhelin a chhunzawm ang.

Mizo footballer langsar Jeje Lalpekhlua chu MPL8 kickoff-tu tur a ni ang.

MPL Kickoff hi MPL ṭan hmain zan lamah hall-a hman ṭhin a ni a, a hmasa berah Indian football legend Baichung Bhutia chu a kickoff-tu a ni. MPL Kickoff hi a tir aṭangin entertainment nen kalpui a ni a, MPL ṭan hmaa neih ṭhin a ni a, zai thiam, lam thiamte leh mi langsarte an inlar ṭhin.

Kumin chu a dan a dang dawn - Lammualah MPL Kickoff neih a nih dawn avangin a ennawm leh ngaihnawm tur lamah pawh ṭan an la nasa hle.

MPL Kickoff-ah hian jersey display neih ṭhin a ni a, tun season chhunga MPL club-te hak tur jersey chu model rualin an pho chhuak ṭhin. Kumin bikah chuan player's introduction neih tel a ni dawn a, MPL player zawng zawngte khelmualah an inlan ang. Grassroots footballer rualin football drill an nei dawn a, player-te'n oath taking an nei bawk dawn a ni.

Kimkima a zai dawn. Kimkima hi a mala zai tur a ni a, a hla lar sa a sak ngei a rinawm a, mipui duh chi hla a ni leh ngei ang. Hlimhlimi leh Lawmi Khiangte pawh zai tur zingah a tel.

A huhoa zai tur, lam thiam rualin an tawiawm bawk tur hi Mizorama a huhoa zai turah chuan ngaihven hlawh pawl an ni hial mai thei - Jerry, DJ-i, Amtea, Feli Fanai, Jaui leh Michelle Varte-te an ni. Anni hi zai thiam an ni mai lo a, a lam chi an ni tih kan hria a, chu chu a hmuhnawmna belhchhahtu a ni ngei ang.

Delta Sound an ṭang a, sound bakah lighting lamah theihtawp an chhuah dawn a, Mizo mipuite tana ennawm leh ngaihnawm 'show' chhawp chhuah ngei an tum.