UPSC Challenge Inter College Quiz Competition 2019 Govt. Serchhip College an thiam ber

UPSC Challenge Inter College Quiz Competition 2019 chu Thawhlehni zan khan a hmawr an bawk ta a, Govt. Serchhip College pakhatna an ni.

Mizo Student's Union (MSU) chuan kum eng emaw zat UPSC exam buatsaih civil service exam-a inziaktling awm lo chu an vei hle a, hemi avang hian 2016 aṭang khan Inter-College quiz buatsaihin, a tirah chuan MPSC Challenge Inter College Quiz Competition tih a ni ṭhin a, kumin aṭang erawhin hmasawn lehzualna atan UPSC Challenge an ti ve tawh thung a ni.

Final hi Sports & Youth Services Minister, Robert Romawia chuan a telpui a,  Govt. Serchhip College leh Pachhunga University College-te chu intumin boruak a sang hle. MSU-in quiz a buatsaih aṭanga pakhatna la ni ngai lo ve ve anni a, college aiawha chhuakten an college tihhmingṭhat tumin theihtawp an chhuah. Result puan hma chuan tunge chak zawk tur pawh hriatthiam a har hle a, mahse a tawpah Serchhip College hi an dingchang ta zawk a ni.

Pakhatna hian trophy leh Rs. 40,000 an dawng a, pahnihna hian trophy leh Rs. 20,000 dawngin, semi finalist-ten Rs. 10,000 an dawng bawk. 

Inter College Quiz hi August 20 zana ṭan kha niin, College 14 an tel a ni.

UPSC Challenge quiz a nih angin zawhna a awlai lo a, kumdang angin point pawh an hmu zung zung lem lo. Round hrang hrangah zawhna har tak tak zawh an ni a, TV lam aṭanga lo thlirtu tam ber pawhin zawhna har thu hi an sawi nasa.

Hetiang hi ni mah se finalist-te hi hmuh an nuam a, boruak zangkhai takin zawhna zawng zawng an dawngsawng thei. Quiz master Lalramhluni Hmar-in boruak rit lutuk tur a chawk zangkhai thiam bawk a,  zawhna har tak karah quiz hmuhnawm tak kan thlir ho a ni.

Govt. Serchhip College hian point 45 hmuin, PUC hian point 35 an hmu a, Serchhip College hi pakhatna an ni ta. Serchhip College aiawha telte hi K. Lalremruata leh H. Lalremruatpuii-te an ni a, an combination a ṭha a, champion an phu. Best Quizee atan PUC team a mi, Laetitia Lalrinngheti thlan a ni bawk.