Ryan Reynolds-te nupain

Hollywood actor Ryan Reynolds leh a nupui Blake Lively chuan US-Mexico ramri-a naupang, an chhungte lak aṭang lakhran an nih lohna tura thawktu pawl pahnih tan US dollar maktaduai hnih an thawh dawn tih an sawi. 

US-a pemlut naupangte dikna chanvo humhalh hna thawktu, NAACP Legal Defence and Education Fund (LDF) leh Young Centre for Immi­grant Children's Rights hnen­ah ṭanpuina hi an pe dawn a ni. Young Centre chuan Mexico ramri kaltlanga US-a pemluh tum zinga naupangte chu an chhungte lak aṭangin lakhran an ni ṭhin tih sawiin, heng naupangte lakhran an nih lohna tur hian an bei ṭhin tih an sawi. Reynolds-te nupain sum an pekte hi naupangte dikna chanvo humhim sak an nih theina tura attorney, social worker leh volunteer-te rawihna atan an hmang dawn tih an sawi. 

Thuchhuah an siamah, Lively leh Reynolds chuan LDF leh Young Centre-in rorelna dik leh democracy humhimna tana an thawhna mai ni lo, midang ṭanpui hna an thawhna chuan an rilru a hneh hle tih an sawi. Hei vang hian an theih anga an thlawpna lantir ve hi a ṭul nia an hriat thu an sawi a ni.

Deadpool leh The Age of Adaline star Reyolds hian a hma pawhin midang ṭanpuina kawngah ke a lo pen nasa tawh ṭhin hle. F--k Cancer leh Michael J.Fox Foundation tan pawh a lo thawk fo tawh a ni. Kum 2008  khan Michael J.Fox Foundation team aiawhin New York City marathon-ah a lo tel tawh a, hei hi a pa, Parkinson disease veitu tana ti a nih thu a sawi. 

Reynolds (42)  leh Lively (32)-te hi kum 2012-ah inneiin fanu pahnih, Inez leh James an nei tawh a, an fa pathumna tur an pai mek bawk.