Ariana Grande-i'n Forever 21 khing

Kum 26-a upa Ariana Grande chuan Forever 21 leh Riley Rose beauty company chu an product thehlar nan, a hming, a inchei dan leh amah ang tak an lo hman avangin a khing.

Ariana hian $mtd 10 chawi turin phut a ni. Forever 21 company hian an product tihlar nana an model hman chu, Ariana music video '7 Rings'-a a in dress dan leh amah ang takin an chei a, hemi avang hian lungawi loin pawisa chawiturin Ariana hian court-ah a khing. A thlalak 30 chuang leh a video ṭhenkhatte chu Ariana phalna loin Forever 21 company hian an product tihlar nan an lo hman sak bawk.

Kumin February thla khan Forever 21 company-te hian Ariana hi an product thehlar turin an lo sawm tawh a, mahse Ariana hian pawisa an pek tur ang a duhkhawp loh avangin a lo hnawl tawh a ni. Kim Kardashian West pawhin a phalna la loa a thlalak an lo hman avangin Forever 21 hi a lo khing tawh bawk. Forever 21 hi an tlachhia niin khawthlang media-te chuan an tarlang.