'Ni e maw' a pui

Mizote'n kan nghahhlelh em em Mizoram Premier League (MPL) Season 8 Kickoff chu Ningani zan khan Lammualah ropui taka neih a ni.

Kuminah hian kum danga kan la hmuh ngai zen zen loh angin Kickoff hi neih a ni a, Mizo-te tan chuan show chhinchhiahtlak a tling ngei ang. MPL Kickoff hi Lawmi Khiang­te chuan hmang ṭangkaiin a music video thar 'Love at first sight' tlangzarhna hun atan a hmang.

He hunah hian Grassroots Football Display chu nuapangte'n an rawn nei a, an hmuhnawmin Lammualah an discipline ṭhatzia an rawn pholang. Khang naupangte zingah khan nakina Football hmanga kan ram tihmingṭhatu an la awm ngei beisei ang. 

MPL club-ten an hak tur jersey chu an club model-te ṭheuhin an rawn pho chhuak a, player introduction pawh neih nghal a ni. 'Ṭhian Rinawm' hitmaker Hlimhlimi chuan Mizo hnam hla "Ro min relsak ang che," ngei mai chu rawn sain, zahna lantirnnan mipuite an ding.

Mizo Idol Jerry-a'n bul rawn ṭanin Mizoram Premier League hlapui 'Ni e maw' chu zaithiam rual ten an rawn sâ. Jerry hi Jauvi, Michelle Varte, Feli Fanai, Dj-i leh Amtea ten an rawn zui - Lammual khata Mipui pungkhawm thawm chu ring tâk a ni. 

Zai thiamte zai a mawi tluk zetin an sira Mizo Dance Camp lamte an hmuhnawm a, mipui mit leh beng a tlai teh e. Kan zaithiamte inbuatsaihna a ṭha a, an zai lai hian an awm mai mai lo. A hla mil tak tura khati taka lam paha an han zai thei khan Mizote hi 'entertainment' lamah kan hniam lo tih a chiang, Hmabak eng tak kan nei tih a lang a, show lian pawh kan zo hle tih a chiang.

Beisei ang ngeiin lighting a pui. Lammual-a kal ve lem lo, ralkhat aṭanga Lammual lam rawn tlirte pawhin lighting a pui tih chu an hre thei ang - Delta an fakawm.

Chutih rualin Kimkima zai tur microphone kal thei lawk lo erawh a pawi a, a 'drama' a tibuai deuh - thil dangah erawh a hit viau vek mai. Oath taking neih zawhah AIFF Player of the Year pawh lo ni tawh Jeje Lalpekhlua chuan MPL chu Kickoff-in, MPL club fan au ring ber Venghnuai FC awmna lamah ball a pet phei. Fans thawm a ṭha, a kickoff lai tak thlalak fuh tumtu photographer-te erawh an hawi buai deuh!

MPL opening function a hmuhnawm a, ram hausa leh ropui zawkte tih nena khaikhin chi ni rih lo mah se, Mizote thlen chinah chuan a aia ropui leh hmuhnawm a awm thei chuang awm lo e. Inkhel tán hma hauhin MPL Season 8 a hmuhnawm nghal.

Zaithiam rual an chhuah hnuah Ambulance hmuh tur a awm. Lam­muala Ambulance rawn tlan lut chu mipuiin an thlir ṭhup a, 'accident an awm a ni maw?' tih tlirin mipuiin an thlir.

Chutah beisei loh dan tâk maiin Ambulance aṭang chuan mi an rawn nawr chhuaka, chu chu tudang ni loin amah Kimkima ngei mai chu a lo a ni! Mipui an phawklek a, thawm a ring kher mai. Thalaite star rawn Kimkima hian 'I zun ngaih lunglen' hmangin kalkhawmte a awi lungleng a, a hnuah a hla thar 'Rangkadartuiluani a rawn' sâ chhunzawm.

He hla hi September 4 khan You­Tube-ah a lyrics video tih chhuah chauh ni mah se mipui lamin an zawm  thei leh der tawh! Mizo mipuiin Kimkima kan duh tih a hriat e.