Investor-te'n indona atan GameStop an hmang!

US game firm GameStop leh company dang ṭhenkhat chu trading platform ṭhenkhatin an share lei theih danah khap chin an neih avangin stock market-a an share sang tak chu nasa takin a tlahniam leh. Chu chuan investor tam tak a tithinur hle.

Khawthlang lamah khu chuan stock market hi an uar a, mi tam takin awmhmun aṭanga sum lakluhna atan an hmang ṭangkai. Reddit hmangtu Investor tenau zawkte inthurualin firm langsar ber zinga tel lem lo GameStop-ah an sum an invest chiam mai a, hei vang hian GameStop hlutna chu nasa takin a san phah a ni. Reddit lama WallStreetBets forum tih rawn tichhuaktu Jaime Rogozinski chuan hetiang a nih hi a rin lawk bik loh thu a sawi hial. Hei hi Wall Street lam huat tawk a tling hle a, chumi a nih avang chuan trading platform ṭhenkhat chuan Reddit hmangtute'n an vawrh GameStop leh market dang ṭhenkhata share lei theih chinah bituk an siam phah a, chung bituk siamtu zingah chuan TD Ameritrade leh Robinhood-te pawh an tel.

He stock market indona hi a lian hle a, American politician pahnih engthil mah a ngaihdan inang ngai lo Ted Cruz leh Alexandria Ocasio-Cortez (AOC) te pawn an ngaihdan a nih loh thu leh Financial Services Committee-in hearing koh an rel pawn an pawm tur thu an sawi a, Securities and Exchange Commission (SEC) pawhin an endik mek tih Nilaini kha chuan an sawi hial.

GameStop hi video game, consumer electronics leh gaming hmanrua chi hrang hrang zuartu a ni a, khawvel hmun hrang hrangah dawr 5509 an nei a ni. Hrileng vanga mi an chhuah theih loh avangin gamer-te chuan an pan ngai lo a, hripui leng karah gamer-te chuan video games online lama khelh an uar zual. Nasa takin an market value a tlak hniam rin sa a ni a, chu vang in Wallstreet trader ten GameStop stock chu an short sell nasa hle.  

Mahse chutiang chu a ni hauh lo. Reddit-a WallStreetBets forum follow-tu investor tawnhriat la ngah lem lote chuan kar hmasa aṭang khan an company stock an lei chiam mai a, Nilainiah phei kha chuan 135% laiin a sang, January ni 12-a an company hlutna aiin 1,700% laiin an company a hlu tawh zawk. An company hlut zawng chu $tld 23 laite a ni hman.

GameStop hlutna tisangtu investor-te hian tum mumal tak an nei niin a lang. Hrileng vanga harsatna tawk AMC theatre-a share pawh an lei nasa a, BlackBerry, Bed Bath & Beyond-te pawh he hlawkna teltu zingah hian an tel.