HONTRADE INTERNATIONAL ṬHAZUAL FAKNA-AH The Prophets 'Mangang Authawm' a mawi ber
Music video an siam hnu lawkah chart-ah an lang nghal a, hma sawn zelin tunah chuan thlan hlawh ber an ni ta. The Prophets 'Mangang Authawm' chu Hontrade International Ṭhazual Fakna chart-ah pakhatna an ni a, Malsawmdawngkimi 'A lo kal thuai dawn' chu pahnihna niin, Thawhlehnaniropuia 'I tan ka hlan e' chu pathumnaah a rawn inhlangkai.
'Mangang Authawm' a nalh
'Mangang Authawm' hi The Prophets hla thar a ni hran lo a, 2012-a an siam daih tawh kha niin, 2012 Scavenger rock Idol, Vanapa Hall-a neihah khan a ṭumkhatna atan an perform pui nghe nghe.
A tirah chuan English in he hla hi an siam hmasaa, 2015-a Music Home Beat contest-ah khan Mizo hla sak ngei ngei a ngaih avangin Mizo version hi siamin pakhatna an nihpui hial a ni. Progressive Metal band hi Ṭhazual chart-ah hian an lang khat hle a, Mizo-ten helam hawi music kalpui kan ngah vak lo bawk nen, The Prophets-ten chart-a dinhmun sang ber an rawn luah thei hi a hlu hle.
'Mangang Authawm' hla hi a nalh hle a, music a 'tight' ṭha a, an combination ṭhat zia hei hian a tilang. Vocalist Ronnie Hmar zai mawi tak leh aw sang tak hian he hla hi a chawi em em a, an music arrangement pui tak hian ngaihthlak a ti manhla hle bawk.
He hla hi an hla siam tawh hoa an chhuan pawl tak a nih thu the Prophets hian an tarlang a ni.
'Mangang Authawm' hi music video an siam hma hauh hian an sa nasa hman hle a, nikum khan official music video hi siam turin thutlukna erawh an siam chauh tih guitarist Eric Renza chuan Vanglaini a hrilh.
Malsawmdawngkimi leh Thawhlehnaniropuia
Chart-a No.1 hial pawh lo ni tawh Malsawmdawngkimi 'A lo kal thuai dawn' chu pahnihnaah a rawn inhlangkai leh a, he hla hi a chang leh a tlahniam a, hma a rawn sawn leh ṭhin a, No.1 a ni nawn leh thei ang em tih chu hriat a chakawm hle.
Pathumnaah hian Thawhlehnaniropuia 'I tan ka hlan e' chu a rawn inhlangkai ve leh bawk a, ani hi hmasawn zawngin a kal char char a, dinhmun sang ber luah thei turin hmabak a nei eng hle a ni. Esther Khiangte 'An eng reng ang' chu palinaah a tla thla ve thung a, chart hmasaa pakhatna hial ni thei kha a ni a, hma a rawn sawn leh a nih pawhin a mak lo ang.
Lalremruati (Naemi) rawn come back-na hla 'Intlansiakna' chu pangana a ni bawk a ni.
Hontrade International Ṭhazual Fakna chart Top 10
1 The Prophets Mangang Authawm
2 Malsawmdawngkimi A lo kal thuai dawn
3 Thawhlehnaniropuia I tan ka hlan e
4 Esther Khiangte An eng reng ang
5 Lalremruati (Naemi) Intlansiakna
6 Hmingtea Chhangte Isua hmel
7 Lalnunhlua Chhakchhuak Kross lerah
8 Ocean Avenue Lalpaah lawm la
9 Lalrampari Khiangte Pa a lungawi tawh si
10 H. Laltharzuali Chawimawi che ka duh