'Joker'-in Venice Film Festival-ah Golden Lion a dawng
2019 Venice Film Festival-ah 'Joker' film thar chuan Golden Lion award a dawng a, Oscar dawng thei tura intlansiaknaah a dinhmun a sawh nghet.
Venice Film Festival hi Inrinni khan neih a ni a, Joaquin Phoenix-a 'Joker' hian chawimawina ngaihhlut hi a dawng a ni. Joker hi October thlaa tlangzarh tur chauh a la ni a, a hmuhnawm viau ang tih a rinawm. Hun hmasa lama Joker role lo play tawh ten an hnehsawh viau zel a, sawizui pawh an hlawh thei viau. Hemi a nih avang hian Joker film thar tur hian ngaiven a hlawh zual hle.
Khawthlang media ṭhenkhat chuan Robert Pattinson-a 'Batman' nen an 'crossover' dawn ni ten an sawi leh ṭan tawh a, hei hi a thleng dik a nih chuan a hit hle tura ngaih a ni. Joker hi Batman-a hmelma ber ti ila kan sawi sual awm lo e. Hemi a nih avang hian Joker tihchhuah tur pawh hi Batman fan-te chuan an nghakhlel tawh hle a ni.
Award dang dawngtu langsar
Roman Polanski film 'An Officer And A Spy' chuan The Grand Jury Prize a dawng a, The Silver Lion For Best Director award chu 'About Endlessness' director Helmer Roy Andersson kutah hlan a ni bawk.