DCEU News Wonder Woman 1984 Streaming platform-a Feature Film entu ngah ber

Israeli actress chhe lo tak Gal Gadot channa DC Universe film Wonder Woman 1984 chu tlangzarh karah khan entu an tam rem rem hle a, feature film, streaming platform-a tlangzarh kara entu tam ber record a siam niin Amercian data leh market measurement firm Nielsen chuan a tarlang.

Wonder Woman 1984 hi HBO Max leh theatre-a en theih turin nikum December 25 khan tlangzarh a ni a, tlangzarh karah hian entu an tam nghal hle a, he film enna atan hian HBO Max hmangtute chuan kar khat chhungin minute tluklehdingawn 2.25 zet zu han hmang a! Hei hi a film vawi maktaduai 14.9 play chhuah nen a inhen!

Nielsen chuan hemi chungchang hi an twitter-ah tarlangin Gal Gadot, Petty Jenkins leh WW84-a changtu dangte chu an lawmpui thu an tarlang. Wonder Woman 1984 hmaa he record lo siam tawh thu chu Disney+ in an pek chhuah Pixar's Soul kha niin, kar khat chhungin film enna atan minute tld 1.67 an hmang a, WW84 hian he record hi rawn khumin Pixar's Soul ai hian minute mtd 580-in an en nasa zawk a ni.

Covid-19 hripui len vanga theatre tam ber inkhar avangin WW84 hian Box Office aṭangin sum a lalut tam lutuk thei lo a, HBO Max lamah erawh entu an tam turu hle a ni. Pirate version lo entu zawng zawngte nen phei chuan entu zat tur hi chhut thiam pawh a har zawk ngei ang.

WW film hmasa kum 2017-a tihchhuah khan box office aṭangin $mtd 800 aia tam sum a lalut thei a, hri chu leng lo se WW84 sum lakluh pawh hi a namai lo hle ang tih a rin theih. Wonder Woman hi January 25 aṭang khan HBO Max-ah hian dah a ni leh tawh lo a, theatre-ah erawh la chhuah chhunzawm zel niin Amazon Video ang chi VOD service lamah erawh lei emaw hawh theihin emaw a la awm thuai rin a ni.